Нийслэлийн Мэргэжлийн хяналтын газраас архи, согтууруулах ундаа үйлдвэрлэл эрхлэгч, аж ахуйн нэгжийн тусгай зөвшөөрлийг хүчингүй болгосон үйлдвэрийн нэрсийг зарлалаа.
Тодруулбал, Засгийн газрын 2018 оны гуравдугаар сарын 27-ны 86 дугаар тогтоолоор Баянгол дүүрэгт байрлах “Монгол инженер” ХХК-ийн “Хөх тэнгэр”, “Одтой Чингис” бүтээгдэхүүн, мөн өдрийн тогтоолоор Сонгинохайрхан дүүргийн “Цэс хайрхан” ХХК-ийн “Ликер” бүтээгдэхүүн, энэ оны дөрөвдүгээр сарын 3-ны өдрийн 130 дугаар тогтоолоор Баянзүрх дүүргийн V хороо “Мөнхжин од” ХХК-ийн “Мөнхжин”, “Найрсаг”, “Хандгай” зэрэг бүтээгдэхүүн үйлдвэрлэдэг тусгай зөвшөөрлийг хүчингүй болгожээ.
Түүнчлэн Засгийн газрын энэ оны дөрөвдүгээр сарын 3-ны өдрийн 130 дугаар тогтоолоор Баянзүрх дүүргийн 10 дугаар хороонд байрлах “Хүрд трейд” ХХК-ийн “Монгол нэрийн шар айраг” бүтээгдэхүүн, мөн Сонгинохайрхан дүүргийн IV хороонд байрлах “Улаанбаатар спирт” ХХК-ийн үйлдвэрлэдэг “Спирт” зэрэг бүтээгдэхүүн үйлдвэрлэдэг ААН-ийн тусгай зөвшөөрлийг хүчингүй болгожээ.