УИХ-ын чуулганы хуралдаанаар Үндсэн хуульд нэмэлт, өөрчлөлт оруулах төслийг гуравдугаар хэлэлцүүлгийг хийж эхэлсэн. Хэлэлцүүлгийг Төрийн байгуулалтын байнгын хорооны хуралдаанаар хэлэлцэж дэмжсэн юм. Мөн УИХ дахь АН-ын зөвлөлөөс тавьсан хоёр саналын хүрээнд Д.Эрдэнэбат гишүүний зүгээс тавьсан горимын саналыг Байнгын хорооны хуралдаанаар дэмжээд байна. Хэлэлцэж буй асуудалтай холбогдуулан чуулганы нэгдсэн хуралдаанд оролцож буй гишүүд Ажлын хэсгээс асуулт, тодруулга авлаа.

Хэлэлцэж байгаа асуудалтай холбогдуулан УИХ-ын дарга Г.Занданшатар "Үндсэн хууль бүхэлдээ 2020 оны тавдугаар сарын 25-наас хүчин төгөлдөр болно" гэж заасан. Түүнээс хойш хугацаа тавьж болно. Сонгуулийн холимог тогтолцоог урагшлуулах бололцоогүй. Журмыг хуулиар тогтооно. Жилийн өмнө хуульд өөрчлөлт оруулж  болохгүй гэсэн заалттай. Сонгуулийн  тогтолцоог 2020 оноос өмнө мөрдөх хууль зүй, техникийн бололцоогүй. Энэ хуулийг жич хэлэлцэж болно” гэлээ.

Харин Байнгын хорооны дарга С.Бямбацогт “АН-ын зарчмын хоёр санал нь журмын тухай хууль зөрчөөгүй. Орон нутагтай холбоотой асуудалд сумын Засаг даргыг ард түмнээс сонговол төрдөө удирдагдахгүй байж болзошгүй гэж үзсэн. Тиймээс нээлттэй үлдээж шийдэх бололцоотой гэдэг үүднээс хойшлуулсан. Үүнийг органик хуулиар шийдэх боломжтой. Нутгийн удирдлагын чиглэлээр төвлөрлийг сааруулах, өмчийн удирдлагыг хэрэгжүүлэх, орон нутагт эрх мэдлийг шилжүүлэх, хот тосгон байгуулах эрхийг нээж өгч байгаа” гэсэн юм.

С.Сүлд