УИХ-ын чуулганы нэгдсэн хуралдаанаар Үндсэн хуульд нэмэлт, өөрчлөлт оруулах төслийг баталлаа. Энэ нь 1992 оны ардчилсан шинэ Үндсэн хууль болон 1999, 2000 оны нэмэлт, өөрчлөлтөөс хойшхи 19 жилийн дараа хийж буй засаглал, хууль шүүхийн байгууллагад хийж буй томоохон өөрчлөлт болж байна. 

Хаврын ээлжит чуулганаас хэлэлцэж эхэлсэн Үндсэн хуульд нэмэлт, өөрчлөлт оруулах төслийн зүйл заалт бүрийг УИХ-ын дарга Г.Занданшатар гишүүдэд уншиж танилцуулснаар 100 хувийн саналаар баталсан нь энэ. Чуулганы хуралдаанд 63 гишүүн оролцож, гар өргөх замаар баталгаажуулсан юм.

Үндсэн хуульд нэмэлт, өөрчлөлт оруулах төсөл 2020 оны тавдугаар сарын 25-ны 12.00 цагаас улс орон даяар дагаж мөрдөнө гэдгийг УИХ-ын дарга Г.Занданшатар энэ үеэр дуулгасан юм. Үүнээс өмнө УИХ Үндсэн хуулийн нэмэлт, өөрчлөлтийг дагаж мөрдөхөд шилжих журмын тухай хуулийг батлахаар болж байна. Нэг үгээр, Үндсэн хуулийн нэмэлт, өөрчлөлт мөрдөгдөх хүртэл парламентаас хууль эрх зүйн орчныг сайжруулах, бэлтгэл ажлын хийх зохицуулалтыг хийх юм. Үндсэн хуульд оруулсан нэмэлт, өөрчлөлтийн талаарх дэлгэрэнгүй мэдээллийг бид удахгүй хүргэх болно.

С.Сүлд