Өнөөдрөөс эхлэн нийслэлийн захад амьдардаг 3000 орчим сурагчдыг гэр, сургуульд нь зөөвөрлөх автобус явж эхэлнэ. Энэ талаар Нийслэлийн нийтийн тээврийн үйлчилгээний газрын Төлөвлөлт, технологийн хэлтсийн дарга С.Цэцэгмаагаас тодрууллаа.

-Өнөөдрөөс сурагчдын автобус үйлчилгээнд гарна. Бэлтгэл ажил хангагдаж дууссан уу?

-Нийслэлийн Засаг дарга бөгөөд Улаанбаатар хотын захирагчийн 2016-2020 оны үйл ажиллагааны хөтөлбөрт сургуулийн автобус төслийг хэрэгжүүлэх талаар тусгагдсан байдаг. Үүний дагуу БСШУСЯ-тай хамтран ажиллалаа. Бэлтгэл ажил бүрэн хангагдсан. Сурагчдын автобусд нийт 40 орчим автобус үйлчилгээнд гаргана. Ингэхдээ ерөнхий боловсролын 29 сургуулийн 2-5 дугаар ангийн 3000 гаруй сурагчдад үйлчилнэ.

-Дээрх 29 нь сургууль нь бүгд улсын сургууль уу?

-Тийм.

-Сурагчдын автобус хэдэн чиглэлд явах юм бэ?

-Сүхбаатар, Баянзүрх, Чингэлтэй, Хан-Уул, Баянгол зэрэг дүүргүүдийн алслагдсан цэгүүдээс тухайлбал, 85, 136, 127, 71 зэрэг цэгүүд рүү мөн явна. Мөн Ботаник, 5 шар, 7 буудал, Буянт-Ухаа хороолол зэрэг чиглэлээс хотын төвд ирж хичээллэдэг 24, 23, 5, 50 дугаар сургууль руу зорчдог сурагчдыг зөөвөрлөнө. Автобус өглөө, өдөр, орой сурагчдад үйлчлэх бөгөөд зорчилтын судалгааг үндэслэн 34 чиглэлийг боловсруулсан.

-Автобус хэд хэдэн цагуудаас хөдлөх вэ?

-Тодорхой цагийн хуваарийг гаргасан. Тухайн чиглэлээс хамааран өглөө тогтсон цэгээс 07.00 орчмын үед хөдөлж, хичээлийг нь тарах үед гэрт нь хүргэж өгнө. Мөн өдрийн ээлжний сурагчдыг тогтсон цагт сургууль руу нь хүргэж, гэрт нь хүргэж өгөх байдлаар нийгмийн ажилтан хариуцаж явна.

-Түгжрэлийг бууруулах гол шийдэл нь сурагчдын автобус гэж үзэж байгаа. Сурагчдад үйлчлэх автобусын тоог цаашид нэмэгдүүлэх боломжтой юу?

-3000 орчим сурагчдыг зөөх 40 автобус нь дээрх хөтөлбөрийн зөвхөн эхлэл гэж ойлгож болно. Цаашид хамгийн боломжит хувилбараар нь хэвшүүлж, хэрэгжүүлэх төлөвлөгөөтэй ажиллаж байна.

Б.Лхам