Шүүхийн шийдвэр гүйцэтгэх ерөнхий газар, Улсын Ерөнхий прокурорын газрын ял эдлүүлэх ажиллагаанд хяналт тавих хэлтэстэй хамтран “Шүүхийн шийдвэр гүйцэтгэх ерөнхий газрын эрүүгийн шийдвэр гүйцэтгэх ажиллагааны хэрэгжилт, чиг хандлага” сэдэвт эрдэм шинжилгээний хурлыг энэ сарын 13-ны өдөр зохион байгуулав. Хуралд Шүүхийн шийдвэр гүйцэтгэх ерөнхий газар, Хорих ял эдлүүлэх алба, Хорихоос өөр төрлийн ял эдлүүлэх алба, Нийслэлийн шийдвэр гүйцэтгэх газрын дарга, удирдлагууд болон мэргэжилтэн, алба хаагчид, Улсын Ерөнхий прокурорын газрын Ял эдлүүлэх ажиллагаанд хяналт тавих хэлтэс, Нийслэл, дүүргийн прокурорын газрын ял эдлүүлэх ажиллагаанд хяналт тавих ажил хариуцсан прокурорууд эрдэмтэн, багш, оюутнууд оролцсон юм.
Уг хурлаар УЕПГ-ын Сургалтын төвийн сургагч багш, МУИС-ийн Хууль зүйн сургуулийн докторант, прокурор Ц.Мөнхбат “Нийтэд тустай ажил хийлгэх ялын эрх зүйн зохицуулалтын тулгамдсан асуудлыг шийдвэрлэх боломж, гарц”, сэдвээр илтгэл тавьж хэлэлцүүлсэн. Мөн УЕП-ын туслах прокурор, Ял эдлүүлэх ажиллагаанд хяналт тавих хэлтсийн дарга Д.Отгонбаяр хурлаас дэвшүүлж буй санал дүгнэлтийн талаар танилцуулж, хяналтын ажлын чиглэлээр холбогдох заавар, журам, чиглэлийн талаар танилцууллаа. Хуралдаанаас оролцогчдын санал, шүүмжийг дүгнэн хуулийн хэрэгжилтийг нөхцөл байдалтай уялдуулан шинэчлэх, мөн мэргэжлийн байгууллагатай хамтран хорих болон хорихоос өөр төрлийн ял шийтгэгдсэн этгээдүүдэд сургалт зохион байгуулах үйл ажиллагааг өргөтгөх, “нийтэд тустай ажил хийлгэх журам”-ыг шинэчлэх зэрэг асуудлаар зөвлөмж гаргахаар болов.