Энэ долоо хоногт Тээврийн цагдаагийн албаны Жижүүрийн шуурхай удирдлагын хэлтэс нийт 1185 дуудлага мэдээлэл хүлээн авснаас зам тээврийн ослын шинжтэй 876  дуудлага мэдээлэл шалгаж, шийдвэрлэжээ.

Бүртгэгдсэн зам тээврийн ослын улмаас 25 хүн гэмтэж, ноцтой зам тээврийн ослын улмаас нийслэлд нэг, орон нутагт нэг хүний амь нас хохирсон байна. Үүнээс хоёр  хүүхэд хүнд, хүндэвтэр гэмтэж бэртсэн байна.

Тухайлбал, энэ сарын 13-ны өдрийн 19.00 цагийн орчим багануур дүүргийн III хороо “Чулуун карьер” гэх газар асфалтан замд Toyota Estima маркийн автомашин онхолдож, жолооч 67 настай, эрэгтэй Ө нас баржээ.

Мөн энэ сарын 11-ний өдрийн 18.00 цагийн орчимд Төв аймгийн Аргалант сумын нутаг “Галзуу харын худаг” гэх газар асфалтан замд Toyota Prado 120 маркийн автомашин онхолдож, зорчигч 25 настай эмэгтэй, М нас барсан байна.

Энэ долоо хоногт бүртгэгдсэн зам тээврийн осол, хэргийг өмнөх долоон хоногийн нөхцөл байдалтай харьцуулахад нийт дуудлага мэдээлэл 8.3 хувиар, зам тээврийн ослын шинжтэй дуудлага 8.6 хувиар, нас барсан хүний тоо 66.6 хувиар, гэмтсэн хүүхдийн тоо 67 хувиар тус тус буурсан бол гэмтсэн хүний тоо 8.6 хувиар өссөн байна.  

Иймд нийт иргэд жолооч та бүхэн тээврийн хэрэгслийн бүрэн бүтэн байдлыг хангах, орон нутгийн замд гарахдаа цаг агаарыг урьдчилан харах, дулаан хувцас, анхны тусламжийн хайрцгийг бэлтгэн аюулгүй байдлаа ханган хөдөлгөөнд оролцохыг анхааруулж байна.