Монгол Улсын зууны манлай дасгалжуулагч, гавьяат дасгалжуулагч Ш.Бат-Оршихын нэрэмжит жүдо бөхийн "Топ-73" анхдугаар тэмцээн Орхон аймгийн “Хангарьд” спортын ордонд болж, 73 кг-ын жингийн манай шилдэг 33 жүдоч өрсөлдөө.
Энэ тэмцээнд "Будапешт-2017" ДАШТ-ий хүрэл, "Астана-2015" багийн ДАШТ-ий хүрэл медальт, гавьяат тамирчин Ганбаатарын Одбаяр түрүүлж, "Женко" клубийн тамирчин Б.Болор-Очир мөнгө, "Сүлд" спорт хорооны тамирчин Б.Баттөмөр, "Женко" клубийн тамирчин Б.Шинэбаяр нар хүрэл медаль хүртэв. Энэ тэмцээнд түрүүлсэн бөх гурван сая, дэд байрт хоёр сая, хүрэл медаль хүртсэн тамирчинд нэг сая төгрөгөөр шагнаж урамшуулсан байна.
Гавьяат дасгалжуулагч Ш.Бат-Орших нь “Атланта-1996” олимпийн наадмын хүрэл, Ази тивийн анхны аварга, гавьяат тамирчин Д.Нармандах болон “Лондон-2012” олимпийн наадмын хүрэл, ДАШТ-ий хүрэл медальт С.Ням-Очир нарын багш юм.
Б.Жаргал
