Антибиотикийн тэсвэржилт тархахаас сэргийлэх, ирээдүйд гарах аюулаас зайлсхийхийн тулд 2015 оноос эхлэн жил бүрийн арваннэгдүгээр сард “Антибиотикийн талаарх мэдлэгийг дээшлүүлэх” дэлхийн долоон хоногийн аяныг зохион байгуулдаг.

Мөн ДЭМБ-ын Номхон далайн баруун бүсийн хорооны 70 дугаар чуулганаар Номхон далайн баруун бүсэд нянгийн тэсвэржилттэй тэмцэх арга хэмжээг эрчимжүүлэх үйл ажиллагааны хүрээг баталсан. Энэ хүрээнд Эрүүл мэндийн яам, Нийгмийн эрүүл мэндийн төв, Улсын нэгдүгээр төв эмнэлэг, ХХААХҮЯ нар хамтран “Антибиотикийн ирээдүй бид бүгдээс хамаарч байна” уриатай долоо хоногийн аян эхэллээ.

Уг аяны хүрээнд эмч, эмнэлгийн мэргэжилтэн, эмийн санч болон иргэдэд чиглэсэн сургалт, семинар болох юм.

Антибиотикийг нээж, эмчилгээнд хэрэглэсэн нь орчин үеийн анагаах ухааны чухал ололтуудын нэг байсан боловч байнга хэтрүүлэн эсвэл буруу хэрэглэснээс хүн ба амьтны эрүүл мэндэд тулгамдсан асуудлуудыг үүсгэж, улмаар нян антибиотикт тэсвэржиж, эмчилгээ үр дүнгүй болох, эмчилгээний хугацаа уртсах олон аюулуудыг дагуулж байна. 

Нянгийн тэсвэржилтээс болж дэлхий даяар жилд 700 мянган хүн нас бардаг . Үүнээс 230 мянга нь олон эмэнд тэсвэртэй сүрьеэгээс үүдэлтэй гэдгийг гаргажээ. Манай улсын хувьд сүрьеэгийн шинэ тохиолдлуудын 5.3 хувь, өмнөх эмчлэгдсэн тохиолдлуудын 16.5 хувийг эмэнд тэсвэртэй сүрьеэ эзэлдэг байна. Мөн манай улс нийт эмийнхээ 70 орчим хувийг импортоор авдаг бөгөөд эмчилгээнд хэрэглэж буй эмийн 30 орчим хувийг нянгийн эсрэг үйлдэлтэй эм, антибиотик  эзэлж байна гэсэн судалгаа гарчээ.

Хамгийн гол нь антибиотик ховор хэрэглэдэг ч тэсвэржсэн нянгийн халдвар авах эрсдэлтэй аж. Тиймээс антибиотикийг хэрэглэхээс өмнө мэргэжлийн хүнээс зөвлөгөө авах, эрүүл мэндийн мэргэжилтний өгсөн зөвлөгөөг дагаж мөрдөх, гараа тогтмол угааж, өвчин тархахаас урьдчилан сэргийлэх, эрүүл ахуйн шаардлагад нийцсэн хоол хүнс бэлтгэх, вакцинд тогтмол хамрагдах шаардлагатайг анхааруулж байна.

Б.Лхам