БНХАУ-ын Шямин хотноо энэ сарын 30-нд олон өдрийн гүйлтийн тэмцээн болох гэж байна. Тус тэмцээнд манай улсаас Б.Буджаргал оролцох юм.

Зургаан өдөр, зургаан шөнө тасралтгүй үргэлжилдэг “Оюун санааны гүйлт”-ийн тэмцээн Ази тивд анх удаа болж байгаагаараа онцлог юм. Б.Буджаргал 2013 онд 24 цагийн гүйлтэнд 180 км зайг туулж Монгол Улсын рекорд амжилтыг шинэчлэн тогтоож байжээ.

Мөн тэрбээр 2014 онд АНУ-ын Нью-Йорк хотноо болсон зургаан өдрийн гүйлтэд 485 км-ийг туулж тавдугаар байр, 2015 онд мөн Нью-Йорк хотноо болсон 10 өдрийн гүйлтэд 780 км аравдугаар байр, 2016 онд дахин тус тэмцээий 10 өдрийн гүйлтэд 970 км туулж дөрөвдүгээр байр, 2017 оны 10 өдрийн гүйлтэд 1189 км гүйж тэргүүн байр, 2018 оны дөрөвдүгээр сард 10 өдрийн гүйлтэд 1304 км, 2019 оны нэгдүгээр сард Аризонад болсон зургаан өдрийн гүйлтэнд 787 км гүйж тэргүүн байрыншагнал хүртэж байжээ. Мөн энэ оны тавдугаар сард АНУ-ын Нью-Йорк хотноо 10 өдрийн гүйлтэд 1222 км гүйж тэргүүн байр, 2019 оны АНУ-ын Милвакий хотноо зургаан өдрийн гүйлтэд 784 км гүйж тавдугаар байр эзлэн монгол хүний тэсвэр хатуужлыг дэлхийд харуулж чадсан тамирчин билээ.

Тэрбээр 2020 оны зургадугаар сард АНУ-ын Нью-Йорк хотноо 52 хоногийн турш үргэлжилдэг дэлхийн хамгийн холын зайн гүйлтийн тэмцээнд оролцон дээд амжилтыг нь эвдэх зорилготой бэлтгэл сургуулилтаа хийж байна. Уг тэмцээн нь 40 хоног 16 цагт 5000 км замыг туулж байсан дээд амжилтын түүхтэй юм байна.

Б.Буджаргал Монгол Улсын Батлан хамгаалахын их сургуулийг Төрийн захиргаа, бизнесийн удирлага мэргэжилээр төгссөн, гүйлтийн болон уулын спортын мастер тамирчин ажээ. Тэрбээр олон өдрийн гүйлтийн дэлхийн дээд амжилтыг тогтоох эрмэлзлийг нь ивээн тэтгэж өөрөөр нь дамжуулан бараа бүтээгдэхүүнээ дэлхийд сурталчлах байгууллага, энэхүү спортын хүний бие организмд үзүүлэх нөлөөг өөр дээр нь судлах эмч, эрдэмтэн, хоолзүйч, түүхэн амжилтыг нь баримжуулах кино баг, сайн менежер хайж байгаа юм.