Нийслэлийн тэргүүний нэгдүгээр сургуулийн 70 орчим багш сургуулийн захирлын албан үүргийг түр орлон гүйцэтгэгч Д.Цогзолмаатай цаашид хамтран ажиллах боломжгүй талаар Нийслэлийн Засаг Даргын Тамгын газар болон Боловсролын газарт хүргүүлжээ.

Тодруулбал, тус сургуулийн сурагчдын үдийн цайнд өгөхөөр бэлтгэн нийлүүлсэн боорцог үйлдвэрлэлийн хаяг шошгогүй, хатаж удсан байх тул багш нар халдварт өвчин гарах эрсдэлтэйг сургуулийн эмч, нярав нарт анхааруулсан ч “Захирал тараа гэсэн. Тараахгүй бол ажлаас хална гэсэн” гэжээ. Тиймээс багш нарын зүгээс гарын үсэг цуглуулж холбогдох газарт хандсан байна. Одоогийн байдлаар багш нарын өргөдлийн хариу ирээгүй байна.

Харин захирлын албан албан үүргийг түр орлон гүйцэтгэгч Д.Цогзолмаа дээрх асуудлаар олон нийтэд худал мэдээлэл тараасан гэх шалтгаанаар сургуулийн эмч Д.Болормаа болон багш Ч.Энхнасан нарыг ажлаас халах шийдвэр гаргажээ.

Түүний эл шийдвэрийг эсэргүүцэн багш Ч.Энхнасан нийслэлийн Засаг даргад хандсан бөгөөд энэ сарын 18-нд түүнд хариу ирүүлжээ. Өргөдлийн хариунд “Баянзүрх дүүргийн 19 дүгээр хорооны иргэн Ч.Энхсайхан танаас нийслэлийн Засаг даргад ирүүлсэн хандаж ирүүлсэн өргөдөл, хүсэлттэй танилцлаа.

Нийслэлийн ерөнхий боловсролын нэгдүгээр сургуульд үүсээд байгаа нөхцөл байдалтай холбогдуулан тус сургуулийн захирлын албан тушаалд түр орлон гүйцэтгэгчээр томилогдон ажиллаж байгаа Д.Цогзолмаагаас нийслэлийн Засаг даргад хандаж ажлаас чөлөөлөгдөх хүсэлтээ гаргасан.

Иймд өргөдлийг хууль тогтоомжийн дагуу шийдвэрлэх болно” гэжээ.

Б.Лхам