Санхүүгийн зохицуулах хороон дарга С.Даваасүрэнг өнгөрсөн пүрэв гарагийн УИХ-ын чуулганы нэгдсэн хуралдаанаар албан үүргээс нь чөлөөлсөн. Учир нь Монгол Улс “Саарал жагсаалт”-д багтсантай холбогдуулан Монголбанкны ерөнхийлөгч болон Санхүүгийн зохицуулах хороон дарга хариуцлагыг хүлээх ёстой гэж үзсэн нь энэ юм. Улмаар энэ сарын 5-нд албан ёсоор ажлаас чөлөөлөгдөх өргөдлөө өгсөн билээ. Тэрбээр албан үүргээ хүлээлгэн өгснийхөө дараа анх удаа цахим хуудсанд өөрийн байр сууриа илэрхийлэв.

Тодруулбал, “Монгол Улсын Санхүүгийн зохицуулах хорооны даргын албан тушаалыг 40 сарын хугацаанд хашихдаа санхүүгийн салбарын өнгөрсөн 30 жилийн түүхэнд байгаагүй өндөр өсөлт, гэрэл гэгээг оруулж ажиллаж чадлаа. Монгол Улсын банкнаас бусад санхүүгийн салбар болох үнэт цаас, даатгал, ББСБ, ХЗХ-дын үйл ажиллагаа сүүлийн 3 жилд өргөжин тэлж, 200 хувь өссөнийг тоо баримт бэлхэнээ нотолно. Санхүүгийн зах зээл өсөж тэлэхгүйгээр үр өгөөжийг нь иргэддээ хүртээх боломжгүй, өсөлтгүйгээр санхүүгийн зах зээл өөрөө хөгжихгүй...

Тиймээс олон нийтийн анхаарлын гадна, орхигдсон, идэвхгүй, сул байсан санхүүгийн зах зээлийг өсгөх, хөгжүүлэхэд ихээхэн хүчин чармайлт гарган хамтран ажилласан Санхүүгийн зохицуулах хорооны баг хамт олондоо чин сэтгэлийн талархал илэрхийлж, та бүхнийхээ цаашдын ажил амьдралд хамгийн сайн сайхан бүхнийг хүсэн ерөөе! Өнгөрсөн хугацаанд Санхүүгийн зохицуулах хорооноос хэрэгжүүлсэн зөв тууштай бодлого зохицуулалт, оролцогч санхүүгийн байгууллагуудын идэвх оролцоо, төр, төрийн бус байгууллагуудын хамтын ажиллагаа, санхүүгийн салбарт итгэсэн иргэдийн маань итгэлийн үр дүнд санхүүгийн салбарт ассан ГЭРЭЛ цаашид улам тодрон гялалзахыг ерөөгөөд хамтран ажилласан оролцогч бүх байгуулага, иргэддээ гүн талархлаа илэрхийлье!” гэжээ.

Б.Лхам