Хүн бүрийн мөрөөдөл өөр. Миний мөрөөдөл бол эрүүл болж ээжийнхээ нүдэнд гэрэлтэх тэр их баяр хөөрийг харах, нуруунд минь тээлгэсэн хүнд ачааг нэг л өдөр арилахад ээжийн минь сэтгэл эгцэрч инээмсэглэн жаргахыг мэдрэх юм. Би бол ээжийнхээ бахархал. Хөгжлийн бэрхшээлтэй хэдий ч нялх багаас минь хайрлаж өсгөсөн ээж, өвөө хоёртой, намайг ойлгож, түшиж тулдаг хамт олонтой, зовох цагт үргэлж хажууд минь байдаг сайхан найзуудтай би азтай хүн.

Б.Анхзаяа миний бие Зуун айл тооцооны төвийн харилцааны менежерээр ажилладаг. 1992 онд Өвөрхангай аймгийн Баянгол суманд төрсөн. 2010 онд Дорноговь аймгийн Сайншанд сумын 1-р сургуулийг онц дүнтэй, 2014 онд Мандах бүртгэл дээд сургуулийг нягтлан бодогч мэргэжлээр тус тус суралцан төгссөн. Оюутан байх хугацаандаа онц сурдаг, нийгмийн идэвхитэй, манлайлагч оюутан байсан тул Хаан банк сангийн тэтгэлгээр 4 жил суралцсан.

Ажлын гараагаа 2014.10.28-нд Хаан банкны Спортын төв ордон тооцооны төвд борлуулалт үйлчилгээний ажилтнаар эхэлж улмаар МУИС тооцооны төвд БҮА, БҮА-Вип, 2019 оны 01 сараас эхлэн Зуун айл тооцооны төвд харилцааны менежерийн албан тушаалд дэвшин ажиллаж байна. Ажилдаа чин сэтгэлээ зориулан, хичээл зүтгэл гарган ажиллаж хамт олноо тэргүүлэн 2017 онд МУИС тооцооны төвийн "Шилдэг ажилтан", 2018 онд Хаан банкны "Шилдэг БҮА-вип ажилтан"-аар шалгарсан.

Би ээжээс төрөхдөө төрөлтийн хүндрэлээс шалтгаалан төрөлхийн нурууны мурийлттай болсон. Онош нь скилиоз /scoliosis/ Нурууны өвдөлт болон мурийлт жилээс жилд нэмэгдэн одоо зүрх уушиг болон зүүн хөлний мэдрэлд нөлөөлөн зарим үед доголох зэрэг шинж тэмдгүүд илэрч байгаа бөгөөд яваандаа хөдөлмөрийн чадвараа бүрэн алдах хэмжээний эрсдэлтэй байгаа юм. Олон жил өвчиндөө шаналан хагалгаа хийлгэхээр судалж байсны эцэст 2019 оны 9 сарын 13-нд Гэмтэл согог судлалын үндэсний төвд Турк улсын Мемориал эмнэлгийн сээр нурууны мэс заслын эмч Доктор профессор Онур Яаман эмчийг Монголд ирсэн даруйд үзүүлсэн бөгөөд яаралтай хагалгаанд орохыг санал болгон 90 хувь эрсдэлгүй эмчлэгдэх талаар мэдэгдсэн. Нурууны мурийлт тэгшлэх хагалгааны зардалд 29,380 доллар шаардлагатай болсон. Энэхүү хагалгааг хийлгэх санхүүгийн боломж надад болон гэр бүлд маань хомс байгаа тул та бүхэндээ хандахаар шийдсэн билээ.

Өнөөдрийг хүртэл амьдарч, ажиллах хугацаандаа өөрийгөө хөгжлийн бэрхшээлтэй гэж шантралгүй үе тэнгийн хүүхэд залуусын хамт мөр зэрэгцэн сурч, ажиллан эх орныхоо хөгжил дэвшилд хувь нэмрээ оруулан бие эрүүл, сэтгэл дүүрэн хийж бүтээх эрч хүч, урам зоригоор жигүүрлэн эх орныхоо хөгжлийн түүхийг бичилцэх нэгэн эд эс байхыг цаг ямагт хүсдэг. Та бүхнээс өвчин шаналалгүй эрүүл саруул болоход минь тусламж, дэмжлэг үзүүлэхийг чин сэтгэлээсээ хүсч байна.

ИЛТГЭЛИЙН ТЭМЦЭЭНД ОРСОН МАТЕРИАЛ НЬ

Сайхан Монгол орны минь салшгүй ирээдүй болсон Саруул ухаант хүмүүн бидэнд соёлыг түгээхээр ирсэн элч нартаа энэ өдрийн мэндийг хүргэе. Өөрийн амьдралд тохиолдсон бэрхшээлүүдээ хэрхэн даван туулж ирсэн талаарх бяцхан амжилтын түүхээ хуваалцах боломж олгосонд туйлын баяртай байна. 2014 оны Хаан үдэш миний хувьд ажилд орсон анхны шинэ жилийн үдэшлэг байлаа. Мундаг ах эгч нар шилдэг ажилтан болоод л тайзан дээр нэрээ дуудуулж гараад л их сайхан цаг мөч байлаа. Тэр үед би хичээж сайн ажиллаад заавал шилдэг ажилтан болноо гэж дотроо бодож байлаа.

Үнэхээр бодол биеллээ олдог юм билээ. 2018 оны Хаан үдэш үнэхээр гайхалтай үдэш байлаа. Тайзнаас буусан тэр мөчөөс л өөрийгөө оскарын шагналтан од мэтээр төсөөлж их л баяр жаргалтай алхаж байлаа. Энэ шагнал бол 4 жилийн ажлын минь үр дүн байсан учраас тусалж дэмждэг бүх ажилтнууддаа болон эрхэм харилцагч нартаа үргэлж талархдаг юм. Үүнд хүрэх хүртлээ би юуг даван туулсан бэ? Ижий минь намайг бусдын адил эрүүл саруул бие хаатай төрүүлж чадаагүй ч өв тэгш хүмүүжилтэй, тэвчээртэй, боловсролтой, өөдрөг үзэлтэй, хүсэл мөрөөдөлтэй болгон өсгөсөн юм. Хэдийгээр миний гаднах байдал хөгжлийн бэрхшээлтэй гэж тодорхойлогдож байгаа ч оюун ухаан минь азаар эрүүл саруул байсан юм. Би өөрийгөө тэвчээрийн хатан хаан гэж боддог юм. Учир нь надтай тааралдсан хүн бүр эвэртэй туулай харсан мэт хэдэн минутын туршид харцаа над руу чиглүүлдэг байсан юм. Хоорондоо намайг заан ярилцах, өрөвдсөн харц, эгдүүцсэн харц... Өдөр бүр ангийн сахилгагүй жаалуудаар шоглуулан гэртээ ирж уйлдаг байсан хэцүү үеүд минь надад тэвчээртэй байх хичээлийг заасан юм. Хөөрхий ижий минь хэлэхдээ миний охин онц сур, мэдлэгтэй хүнийг хэн ч дээрэлхэж чаддаггүй юм гэж намайг зоригжуулж аргаддаг байж билээ.

Би их хичээнгүй сурагч байлаа. Ахлах ангиасаа газарзүйн хичээлдээ ихэд дуртай аймаг, улсын олимпиад, тэмцээнд идэвхтэй оролцдог шаргуу охин байлаа. Хүн юу тарина, түүнийгээ л хураан авна гэдэг шүү дээ. 2010 оны хавар Хаан банк сангийн тэтгэлэгт материалаа өгөхийг газарзүйн багш минь санал болгосноор би Хаан банк гэдэг их айлтай хувь заяагаа холбосон юм. Банкныхаа тэтгэлгийг хүртсэн тэр үеэс л банкинд ажилладаг хүн болъё гэж бодон Санхүү эдийн засгийн дээд сургуулийн маркетингийн ангиа Мандах бүртгэл дээд сургуулийн банкны эдийн засаг, нягтлан бодох бүртгэлийн ангиар сольсон юм.

1-р курстээ ирээдүйн ажлынхаа нэрийн хуудсаа хий гэхэд банкныхаа логог зурсан байдаг юм. Банкныхаа тэтгэлгийг 4 жил хүртсэний дараа эргэлт буцалтгүй энэ байгууллагад ажиллах хүсэлтэй боллоо. Ажлын ярилцлага, шалгалтандаа тэнцэн орон тоо гартал удаан хүлээсний эцэст хүний нөөцөөс холбогдон гэрээ хийх талаар дуулгалаа. Намайг банкинд жинхэнэ утгаараа хөл тавихад минь туслан надад итгэл хүлээлгэн ажилд авсан хүн бол тухайн үеийн Спортын төв ордон тооцооны төвийн А.Ганзориг захирал юм. Миний хувьд талархан хүндэлж явдаг хүмүүсийн минь нэг. Ажилд орох хэдий сайхан байсан ч харилцагчдын бүдүүлэг харилцаа сэтгэлийн тэвчээрийг минь шалгадаг байлаа. Мундаг ах эгч нарынхаа тусламж дэмжлэгээр өдрөөс өдөрт өсөн дэвжсээр... Ажлаа сайн хийх юмсан, нэг хүнд ч гэсэн тусалчих юмсан, хүнтэй зөв сайхан харилцаж байх юмсан гэж их л хичээдэг дээ. Өөртөө итгэлгүй,өөрийнхөө үнэ цэнийг мэдэрдэггүй, гутарч гунихарч явсан цаг хугацаа олонтой байсан ч аливаад тууштай, хичээнгүй, тэвчээртэй зан чанар, өөдрөг үзэл, эерэг бодол, зөв хандлага, маань өнөөдрийн намайг бий болгосон юм. Гадаад гоо сайхнаас илүүтэйгээр дотоод сэтгэлийн гоо зүй л хамгаас чухал юм байна лээ. Харилцаа, хандлага, инээмсэглэл биднийг чимдэг гэж боддог. Өөрийгөө үргэлжид зоригжуулан өөртөө итгэлтэй байх хэрэгтэйг би ухаарсан юм. Энэ бүхний эцэст л дээр бичсэн амжилтандаа хүрсэн байх. Би бусдаас дутуу гэсэн мэдрэмжээр аливаад хандаад байх юм бол өөртөө итгэлгүй байдал үүсэн улмаар юуг ч хийж бүтээх хүсэл эрмэлзэлгүй болдог. Хүн амьдралынхаа туршид унаж босож олон даваа гүвээ, саад тотгорыг даван туулдаг шүү дээ. Тэр агшин бүрт л өөрийгөө ямар үнэ цэнэтэй хүн гэдгээ ухамсарлаж, би чадна, чадах ёстой гэж бодон өөдрөг байх ёстой юм шүү. Амжилт гэдгийг бид маш томоор төсөөлдөг. Гэвч үнэндээ өөртөө амласан жижигхэн зорилгодоо хүрсэн л бол тэр амжилт юм шүү. Миний амжилтын түүчээ үргэлжилсээр байх болно оо. Та бүхэнд баярлалаа. Ажлын амжилт хүсье.