2019 оны эхний арван сарын байдлаар нийт долоон удаагийн тохиолдлоор 4.5 кг орчим мансууруулах бодис, сэтгэцэд нөлөөлөх эмийг улсын хилээр нэвтрүүлэхийг оролдсон гэмт хэрэг бүртгэгдсэн. Түүнчлэн энэ төрлийн бодисын хэрэглээ 18-35 насны залуусын дунд нэмэгдэж буй бөгөөд ялангуяа гэр бүлийн хос, жирэмсэн эмэгтэйчүүд хэрэглэх явдал гарах болсон гэдгийг онцолсон “Хар тамхины хор хөнөөл, түүнээс урьдчилан сэргийлэх асуудлыг хэлэлцэх онол, практикийн бага хурал” өнөөдөр болж байна. Тус хурлыг Гаалийн Ерөнхий газар, Цагдаагийн Ерөнхий газар, Сэтгэцийн эрүүл мэндийн үндэсний төв болон их, дээд сургуулиудын оюутан залуус оролцож байгаа юм.

Уг асуудлаар Гаалийн Ерөнхий газрын гаалийн зөрчилтэй тэмцэх хэрэг бүртгэх газрын хар тамхины хяналтын албаны дарга Б. Сүхбаатар “2019 он гарснаас хойш хар тамхи, мансууруулах бодистой холбоотой гэмт хэргийн тоо болон давтамж нэмэгдэх хандлагатай байна. Энэ оны гуравдугаар сард Испани улсаас Монгол улс руу илгээсэн илгээмжид гаалийн хяналт, шалгалт хийхэд гурван кг хүчтэй үйлчилгээтэй мансууруулах бодисыг илрүүлсэн. Түүнчлэн АНУ-аас захиалсан 0.5 кг мөс, мөн Нигери улсын нэр бүхий иргэд холбогдсон 200 грамм мөсийг илрүүлсэн. Хэргийг цагдаагийн байгууллагад шилжүүлж, мөрдөн шалгалт хийж байна. Хар тамхи, сэтгэцэд нөлөөт эм бэлдмэлийг ихэвчлэн эрэлч нохойн тусламжтайгаар хайдаг. Мөн гэрлийн спекторийн төхөөрөмж, хүний бие шалгах bodyscanner, рентген аппарат зэргийг ашигладаг” гэсэн юм.

Харин  Сэтгэцийн Эрүүл мэндийн үндэсний төвийн Шүүхийн сэтгэц, эмгэг судлалын клиникийн эрхлэгч С.Байгалмаа “Энэ төрлин бодист донтсон хүмүүсийг эмчлэх нь дэлхий нийтэд бэрхшээлтэй хэвээр байна. Мансууруулах бодис хэрэглэдэг, хэрэглээд ирсэн хүмүүсээс зургаан сарын хугацаанд тандалт, судалгааг манай төв хийсэн. Ингэхэд эдгээр хүмүүсийн 11.3 хувьд нь сэтгэцийн эмгэг аль хэдийн үүсчихсэн байсан. Түүнчлэн 18-35 насны залуусын 30 гаруй хувь нь оюутнууд байсан. Тиймээс өсвөр үе, залуусыг түлхүү анхаарах хэрэгтэй байна. Анх удаа сонирхож үзсэн гээд толгойг нь илж болохгүй. Харин ч “Энэ бол гэмт хэрэг, хатуу хуультай” гэдгийг мэдрүүлэх, бусдад анхааруулга болгох ёстой. Нэг удаа хэрэглэсэн л бол давтан хэрэглэх өндөр магадлалта” гэсэн юм.