УИХ-ын намрын ээлжит чуулганаар Байгаль орчныг хамгаалах тухай хуульд нэмэлт, өөрчлөлт оруулах тухай хуулийн төслийг хэлэлцэж байна. Төслийг УИХ-ын гишүүн Б.Бат-Эрдэнэ танилцуулав. Энэ үеэр гишүүд үг хэлж, асуулт асуулаа. 

М.Билэгт: Байгаль орчныг хамгаалах тухай болон бусад хуульд нэмэлт өөрчлөлт оруулах хуулийн төслийг хэлэлцэж байна. Гэтэл өнөөдөр бидэнд УИХ, Засгийн газрын шийдвэрлэвэл зохих асуудал нь иргэдийг ажил орлоготой болгоход анхаарах ёстой. Иргэн баян бол улс баян гэдэг шүү дээ. Бид намын мөрийн хөтөлбөртөө импортлогч орноос экспортлогч орон болно гэж тусгасан. Манай улс сүүлийн 20-оод жил ганцхан уул уурхайгаас хамааралтай байна. Үндэсний үйлдвэрлэгч байхгүй. Ганц гадаадад экспортолж болох уламжлалт аж ахуйн буюу бараа бүтээгдэхүүнийхээ үнийг унагаад байна. Одоо энэ хуулийн төслийг биш энэ асуудалд анхаарах хэрэгтэй. Үүн дээр л иргэд бухимдаж байна. Сайд нь ч байхгүй. Энэ өвөл маш хүйтэн болох нь ээ. Зарим малчид отроор 20 гаруй хоног хээрээр гэр хийж, явган нүцгэн явж байна. Зарим арай гайгүй байгаа аймгуудад хавар урт болно яадаг юм билээ гэж ярьж байна. Удахгүй арванхоёрдугаар сар гарлаа. Байгаль хамгаалах талаар яриад л байна. Уг нь зохицуулах боломж нь байна. Хамгийн гол нь энэ өвөл хэт их  хүйтэрч хамаг мал нь  зуданд өртчихвөл яах вэ.

Ө.Энхтүвшин: Одоогийн байдлаар төвийн аймгуудад өвөлжилт нэлээд хүнд байна. Үүнтэй холбоотойгоор Засгийн газрын өчигдрийн хурадаанаар авч хэлэлцэж, тогтоол гаргасан. Мөн отор нүүдэл хийж байгаа аймгуудад онцгой анхаарах Засгийн газраас хөрөнгө гаргаж байгаа. Учир нь мал эмнэлгийн үйлчилгээ хүрэхгүй шүү дээ. Түүнчлэн аймаг сумын захиргаа байнгын штаб байгуулж ажиллаж байна. Хүндрэлтэй өвөлжиж байгаа аймгуудад өвс үнэгүй, тэжээлийг 50 хувиар бууруулж олгохоор шийдвэрлэсэн. Мөн цаашид ямар арга хэмжээ авбал зохих  талаар судалж байна. Таны ярьж байгаа махны экспорт урьд нь зүгээр гарч байсан юм. Харин энэ жил стандарт заачихаад байгаад л асуудлын гол нь байна. Дулааны аргаар боловруулсан махыг монголчуудад худалдаална гэж байхгүй. Угаасаа идэхчгүй. Тиймээс гаргана гэсэн газар руу нь яаралтай гаргах хэрэгтэй байгаа учраас ХХААҮЯ-нд үүрэг өгсөн.

М.Билэгт: Малчид махаа экспортод гаргах боломжийг л бий болгож өгөөч гэж хүсч байгаа. Түүнээс биш өвс, тэжээл үнэгүй авахыг хүсээгүй.  Хэдэн мал нь зуданд явчихвал өвс үнэгүй аваад яах юм. Эрээнд байгаа хятадууд монголоос хүнсний ногоо, мах, гурилаа авч идэж байна. Бидэнд ийм боломж байна.

Ө.Энхтүвшин: Амьд мал гаргахгүй талаар Засгийн газрын хуралдаанаар ярьсан. Харин өвс тэжээл хэрэггүй гэж хэлж болохгүй. Малчид өөрсдөө хүссэн юм. Ялангуяа Дундговь, Өвөрхангай аймагт энэ жил өвс гараагүй учраас хүнд байна. Тиймээс малчид хүссэний дагуу энэ ажлыг хэрэгжүүлж байна. 

Б.Лхам