Энэ долоо хоногт Тээврийн цагдаагийн албаны Жижүүрийн шуурхай удирдлагын хэлтэс нийт 966 дуудлага мэдээлэл хүлээн авснаас 739 зам тээврийн ослын шинжтэй дуудлага мэдээлэл бүртгэгджээ.

Бүртгэгдсэн зам тээврийн ослын улмаас 16 хүн гэмтэж бэртсэний гурав нь хүүхэд байна. Ноцтой зам тээврийн ослын улмаас орон нутагт нэг хүний амь нас хохирсон байна.

Тухайлбал, энэ сарын 26-ны өдрийн 15.30 цагийн орчимд Баян-Өлгий аймаг  “Толбо нуурын эрэг” гэх газарт  асфалтан замд Ssangyong Musso Хумарбек жолоочтой автомашинтай онхолдож, жолооч 49 настай, эрэгтэй Х нас баржээ.

Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 91 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 14 хүнийг шүүхээр баривчилж хуулийн дагуу хариуцлага тооцсон байна. 

Энэ долоо хоногт бүртгэгдсэн зам тээврийн осол, хэргийг өмнөх 7 хоногийн нөхцөл байдалтай харьцуулахад нийт дуудлага мэдээлэл 24.4 хувиар, зам тээврийн ослын шинжтэй дуудлага 21.8 хувиар, гэмтсэн хүүхдийн тоо 66.6 хувиар тус тус буурсан байна.

Өнөөдөр зам тээврийн ослын улмаас амь насаа алдсан иргэдэд хүндэтгэл үзүүлэх урьдчилан сэргийлэх зорилго бүхий “Хичээх өдөр” арга хэмжээ зохион байгуулагдаж байна. Монгол Улсад зам тээврийн ослын улмаас сүүлийн таван жилд буюу 2014-2018 оны хооронд нийтдээ 2700 хүний амь насаа алдаж, 27080 хүн хүндэвтэр, хүнд зэргийн гэмтэл бэртэл авч эрүүл мэндээрээ хохирсон байна.