Одоогийн Ерөнхийлөгч Х.Баттулга гурван зүйлийг ил тод амлаж сонгогдсон гэхэд болно. Нэг нь 60 тэрбумын асуудал. Төлөвлөсөн, ярьсан, сонссон хэдээс ярьсан хоёр нь ял аваад ачигдсанаас харвал Ерөнхийлөгч Х.Баттулга амлалтаа биелүүлсэн гэхэд болно. Харин хоёр дахь амлалт нь оффшор бүс дэх хөрөнгийг оруулж ирэх. Энэ амлалтын хувьд бараг сураг алдарсан гэхэд хилсдэхгүй. Тэгвэл гурав дахь амлалт буюу ард түмний өрийг тэглэх асуудал нь тухайн үедээ дуулиан тарьж, эцэстээ тэгж амлаагүй гэж мэлзэхэд хүргэсэн. Тэгвэл түүний эл попролыг экс Ерөнхийлөгч Н.Энхбаяр залгамжлаад байна.

Төрийн албыг ураг төрлийнх болгосон, нам дагасан цүнх баригчдыг жинхэнэ утгаар нь төгөлдөржүүлсэн гээд өнөөгийн нийгэм дэх болж бүтэхгүй бүхний эхлэлийг тавьсан гэгдэж хараалгаж, зүхүүлж явсан хүний нэг нь Н.Энхбаяр. Төрийн эрхэнд залрахдаа олон ч амлалт өгсөн, олон ч иргэнийг ардаа чирсэн. Оймсоо гозолзуулснаас хойш улс төрд эргэж орохын тулд эхнэрээ хүртэл УИХ-ын ээлжит сонгуульд нэр дэвшүүлж явсан нэгэн.  

Энэ хэрээрээ сөрөг хүчнээс хүчтэй хаалт хийж түүнийг сонгуульд өрсөлдөх боломжийг хязгаарласаар ирсэн. Тэр ч бүү хэл, ирэх онд болох УИХ-ын ээлжит сонгуульд МАХН-ыг оролцуулах ёсгүй гэсэн акц хүртэл өрнөөд амжсан. Ийм л эгзэгтэй үед МАХН-ын даргын зүгээс ард иргэдийг өөртөө урвуулж, эргэлт буцалтгүйгээр эгнээндээ нэгтгэн нэгэн башир арга хэрэглэж байгаагийн нэг нь зээлийн хүү тэглэх хөтөлбөр. 

Өнөөдөр 12.00 цагаас зовж зүдэрсэн ард иргэдийнхээ зээлийн хүүг тэглэж, амьдрал ахуйг нь дээш татахаар экс Ерөнхиилөгч маань баруун дөрвөн замыг зорих сурагтай. Өмнөх удаа зохион байгуулсан урьдчилгаагүй, хүүгүйгээр орон сууцанд хамааруулна гэсэн уриалгад нь 21 мянган иргэн бүртгүүлсэн гэх. Яг үнэн эсэхийг мэдэхгүй юм. 

За энэ ч яахав, юутай ч МАХН-ын зүгээс зээлийн хүүгээ тэглүүлэх хүсэлтэй иргэдийн хүсэлтийг онлайнаар аваад эхэлчихэж. Тодруулбал, http://maxh.mn/burtgel/?fbclid=IwAR2O0knmrf-Ef9K5k8SislDcmGJiJvQ7or2ZKpCjWlAqFcrarujF8CNz1ps гэсэн хаягаар нийт 12118 иргэн бүртгүүлжээ. Энэ тоог задалбал, тэтгэврийн зээлтэй 2303 иргэн, цалингийн зээлтэй 7727, ипотикийн зээлтэй 1332 иргэн бүртгүүлсэн байх юм. 12 мянга гэдэг тоо нэг их айгаад байх хэмжээнийх биш ч гэлээ үүний цаана хэчнээн хүлээлт байгааг тооцоолох аргагүй. Магадгүй МАХН-ын зүгээс бүртгүүлсэн иргэдийн зээлийн хүүг тэглэх боломжттой гэж мэдэгдсэн нь сугарч хоцрох вий гэсэн айдас төрүүлсэн ч байж мэдэх. Ийнхүү одоогийн Ерөнхийлөгчийн нь өр тэглэх амлалт экс Ерөнхийлөгчийн  зээлийн хүүг тэглэх амлалтаар үргэлжилж байна. 

Иргэн хүн юунд итгэж найдаж, ямар шийдвэр гаргах нь өөрийнх нь сонголт. Гэхдээ өрнөөс өрний хооронд өдөр хоногийг аргацааж буй ард иргэдээр сонгуулийн шоу битгий хийгээсэй. Тэр дундаа төрийн эрхийг атгалцаж явсан, яваа эрхмүүд хэл яриа, үйл хөдлөлдөө анхаарч байхгүй бол иргэд хэн,  юунд итгэхээ мэдэхээ байх нь.

Г.Эрдэнэ