Ирэх 2021 оны нэгдүгээр сарын 1-ээс хүсэлт гаргасан хүүхэд бүрт хүүхдийн мөнгө олгохоор боллоо. Тодруулбал, өнгөрсөн пүрэв гарагийн УИХ-ын чуулганы хуралдаанаар С.Бямбацогт тэргүүтэй гишүүдийн өргөн барьсан Хүүхдийн мөнгөн тэтгэмжийн талаар авах зарим арга хэмжээний тухай тогтоолын төслийг баталсан. Ингэснээр амьжиргааны түвшинг нь харгалзан олгож байсан хүүхдийн мөнгийг 2020 оны нэгдүгээр сараас эхлэн хүсэлт гаргасан хүүхэд бүрт олгохоор болж байгаа юм. Үүнд шаардлагатай нэмэлт санхүүжилтийг 2020 оны төсөвт суулган бөгөөд тогтоолын төслийг санаачлагчид өрхийн мэдээллийн нэгдсэн санд бүртгэлтэй нийт хүүхдийн 90 орчим хувь нь хүсэлт гаргаж хүүхдийн мөнгө авна гэж тооцжээ.
МАН парламентад олонх болсноосоо хойш хүүхдийн мөнгийг ялгамжтай олгох, оюутны 70200 мянган төгрөгийн тэггэлгийг зогсоох зэрэг үйл ажиллагаа нь тухайн үед олны шүүмжлэлийг ихээхэн хүртэж байв. Харин сонгууль хаяа эрх баригчдад хүүхдийн мөнгийг ялгамжтай олгох нь буруу гэдгийг ойлгуулжээ.
Түүнчлэн автозам ашигласны татварыг тав дахин нэмэгдүүлэх талаар яригдаж эхэллээ. Энэ талаар Нийслэлийн Засаг даргын орлогч Ж.Батбаясгалан санал гаргаж, Засаг даргад хүргүүлж буйгаа мэдэгдсэн юм. Тэрбээр энэ тухай “Татварыг ийн огцом нэмэх нь иргэдэд дарамт болох хэдий ч зам дээр түгжирч зогссоноор үүнээс их мөнгийг алдаж байгаа” гэсэн юм. Уг асуудлыг НИТХ-ын ээлжит хуралдаанаар хэлэлцүүлсэн бөгөөд зарим гишүүд тухайлбал, төлөөлөгч С.Мөнхчулуун “Нэгэнт татвар нэмэх бол зөвхөн орлого бүрдүүлэх биш, агаарын бохирдол бууруулах талаас нь харж, автомашины үйлдвэрлэсэн оныг харгалзан шийдвэр гаргах хэрэгтэй” гэсэн саналыг хэлж байв.
Харин цахим хуудаснаас харахад автозам ашигласны татварыг нэмэгдүүлэх нь иргэдийн халаасыг тал бүрээс нь ухах арга гэж үзэж буй юм. Татварыг нэмэгдүүллээ гээд түгжээ багасахгүй учир он өндөртэй автомашинуудыг хөдөлгөөнд оролцуулахгүй байх санал гаргаж байгаа иргэд цөөнгүй байна.
Монголд цахим гэмт хэрэг үйлдсэн байж болзошгүй БНХАУ-ын 800 гаруй иргэнийг албадан гаргасан. Тэднийг аравдугаар сарын 29-30-нд шилжих шөнө “Юнион бюлдинг” оффисын байр болон, гурван дүүрэгт байрлах “Ориентал”, “Кентавр”, “Амар” зэрэг зочид буудлаас баривчилсан юм.
Ингээд уг асуудлаар Засгийн газар хуралдаж, бусад нь хэн оруулж оруулж ирсэн тухай таамаг дэвшүүлж эхлэв. Зарим хэвлэл мэдээллийн хэрэгслээр тэдгээр хятадуудыг АН-ын дарга С.Эрдэнэ оруулж ирсэн талаар бичсэн бол зарим нь Ж.Батзандан болон түүний ах уг хэрэгт хамааралтай гэж бичицгээж байлаа. Тиймээс үүссэн нөхцөл байдалтай холбогдуулан АН-аас ор үндэслэлгүй худал гүтгэлэг гэж мэдэгдсэн бол гишүүн Ж.Батзандан 800 хятадуудыг Шадар сайд Ө.Энхтүвшин оруулж ирсэн хэмээн мэдэгдэв.
Ийнхүү асуудал Шадар сайд руу төвлөрч эхлэв. Дуугүй явах аргагүйд хүрсэн Шадар сайд Ө.Энхтүвшин “Мэдээлэл технологийн чиглэлээр Монголд хөрөнгө оруулалт хийе гэсэн учраас хятадын компанийн гурван хүнтэй уулзсан” гэв. Өөрөөр хэлбэл, Шадар сайд “Уг асуудал надтай хамааралгүй” гэж мэдэгдсэнээр хэн оруулж ирсэн нь тодорхойгүй болж үлдлээ.
Б.Лхам
Сэтгэгдэл (29)