НИТХ-ын өнөөдрийн хурлаар нийслэлийн төсвийг хэлэлцэж баталлаа. Үүнтэй холбогдуулж нийслэлийн Засаг даргын нэгдүгээр орлогч Ж.Батбаясгалангаас зарим асуудлаар тодрууллаа.

-Нийслэлийн ирэх оны төсөвт автозам ашигласны төлбөрийг нэмэгдүүлэхээр шийдвэрлэлээ. Иргэдийн зүгээс уг шийдвэрийг эсэргүүцсэн байр суурьтай байна?

-Автозам ашигласан төлбөрийн асуудлыг эргээд аваад үзэхэд бүтэн жилийн хугацаанд 10 мянган төгрөг нэмээд эргээд төрөөс сайн автозам нэхэх боломж байхгүй болчихоод байна. Монголын Улсын төсөв баталсан. Эргээд автозамынхаа хуулийн дагуу засвар үйлчилгээ, цэвэрлэх хөрөнгийн асуудлыг яриад эхэллээ. Тиймээс автозам ашигласан төлбөрийг тухайн автомашины моторын багтаамж, байгаль орчинд үзүүлж байгаа нөлөллийнх нь дагуу тодорхой хувь хэмжээний асуудлыг ярьж, оруулж байгаа юм. Автозам ашигласны төлбөр нэмэгдсэнээр иргэд сард 8300 төгрөг төлнө. Автозам ашигласныхаа төлөө хоногт 270 төгрөг төлье гэж байгаа юм. Өнөөдрийн байгаа хувь хэмжээгээр автозам ашигласны төлбөр хот доторх автозамыг засаж чадах уу гэвэл, үгүй. Уг асуудлыг танд үзүүлэх ёстой бусад хөрөнгө оруулалтын хэмжээнээс хасч байж шийддэг. Тиймээс үйлчилгээ авч байгаа бол үйлчилгээгээ нөхөх ёстой.

Мөн ирэх онд нийтийн тээврийн 50 орчим хувийг бүрэн шинэчилнэ. Сүүлийн 10 гаруй жил нэг ч автобусыг шинэчлээгүй. Зөвхөн хувийн компаниуд нэмэгдсэн. Энэ жил иргэдэд нийтийн тээвэр хэрэглэх боломжийг нь гаргаж өгч байгаа учраас энэ асуудлыг хөндөж байгаа юм. Ирэх онд 500 хүртэлх автобус нэмэгдүүлнэ. Үүний талыг нь улсын төсвөөс шийднэ. Үлдсэн автобусыг 2021 онд шинэчлэх боломжийг нээж байна.

-Зам ашиглалтын төлбөрийг нэмэгдүүлснээр жилд нийслэлийн төсөвт хэдэн төгрөг төвлөрөх юм бэ?

-50 гаруй тэрбум төгрөг төвлөрүүлнэ гэж харж байна. Бид хоёр зүйлийг ойлгох хэрэгтэй. Иргэдээс авсан татвар эргээд бидний зорчиж байгаа замыг засварлахад зарцуулна.

-Төв цэнгэлдэх хүрээлэнгийн үлдсэн хувийг хувьчлах асуудал яригдаж байна. Энэ талаар мэдээлэл өгөхгүй юу?

-Төв цэнгэлдэх хүрээлэнгийн 51 хувийг 1993 онд хувьчилсан байдаг. Дунд нь маргаан байсныг шүүхийн шийдвэрээр 51 гэж шийдвэрлэсэн. Өнөөдрийг хүртэл Төв цэнгэлдэх хүрээлэн 49 хувийн ашигтай ажиллаж үзээгүй. Нийслэлийн төсөвт нэг төгрөг өгөх нь битгий хэл тодорхой зарлага гаргадаг болчихсон. Жил бүр сандал нэмээд нэмээд 15 мянга орчим хүнд наадам үзүүлдэг. Засгийн газрын шийдвэрээр энэ багтаамжийг 2-3 дахин нэмэгдүүлэх шийдвэр гарч, хотын дарга газрын асуудлыг нь шийдсэн. Ирэх онд бүтээн байгуулалтыг эхлүүлэх хөрөнгө шийдсэн. Тиймээс жил бүр татвар төлөгчдийн мөнгөнөөс зардал гаргах уу. Эсвэл багтаамжийн асуудлыг шийдээд шинэ Цэнгэлдэх хүрээлэнд наадмаа үзэж бусад тоглолт хийж болох боломжоор хангах уу гэдэгт асуудал яригдаж, шийдэгдсэн. Зарлагаа хэмнэ гэж байгаа. Тиймээс улсад нэг ч төгрөгийн орлого оруулдаггүй Төв цэнгэлдэх хүрээлэнгийн газарт дахин нэг үнэлгээ хийж, нээлттэй дуудлага худалдаа явуулна.