“Хар тамхи, мансууруулах бодисын хяналт, хууль, эрх зүйн орчны талаарх” ерөнхий хяналтын сонсголын үеэр УИХ-ын зарим гишүүд асуулт асууж, хариулт авлаа.

УИХ-ын гишүүн Ж.Ганбаатар: Хүмүүсийн хэрэглээд байгаа хар тамхи нь яг аль төрлийнх нь юм бэ. Би хурлын дундуур орж ирсэн болохоор жаахан ойлголттой болох хэрэгтэй байна. Зарим улс оронд хүлээн зөвшөөрдөг төрөл нь мөн юм уу. Монголд яг аль төрлийнх нь түлхүү хэрэглэгдээд байгаа юм бэ. Дараагийн нэг асуудал нь эмчилгээнд хамрагдах хүртлээ донтсон иргэн байхгүй гэлээ. Эндээс бид энэ төрлийн бодисын хэрэглээг таслан зогсоох бүрэн боломжтой юм байна гэж харлаа. Бидэнд ямар боломж байна вэ. Залуу үеийнхэн маань сонирхоод хэрэглэж байгаа бололтой. Түүнээс биш тогтмол хэрэглээд дасал болсон нь цөөхөн гэж харлаа. Үүнд ойлголт авъя.

ЦЕГ-ын Хар тамхитай тэмцэх газрын дарга, цагдаагийн хурандаа Ж.Эрдэнэболд: Монгол улсад энэ төрлийн гэмт хэрэгт холбогдсон үйлдлийн олонх нь каннабис, гашиш, метафетамин буюу мөс гэсэн бодис бүртгэгдсэн. Эдгээр бодис нь НҮБ-ын 1961, 1981 оны мансууруулах, сэтгэцэд нөлөөт бэлдмэлийн жагсаалтад бүртгэгдсэн учраас Монгол Улсад хориглодог.

УИХ-ын гишүүн С.Бямбацогт: Хар тамхи хэрэглэсэн байна гээд баривчилдаг. Нийгмээрээ шуугиад өнгөрдөг. Тэгвэл баривчлахаас өөр ямар урьдчилан сэргийлэх боломж байна вэ. Залуу үеийг үүнээс сэргийлж, жигшүүлэх хэрэгтэй юм болов уу. Дараагийн нэг асуудал нь аль хилийн боомтоор энэ төрлийн бодисыг хууль бусаар нэвтрүүлээд байна вэ. Уг нь хоёрхон хөрштэй шүү дээ. Хил, гаалийхан юу хийж байна вэ?

ГХУСАЗЗийн дарга Л.Нямгэрэл: Коломбо хөтөлбөрийн хүрээнд тодорхой хэмжээний бодлого барьж ажиллаж байна. Гэхдээ мансууруулах бодис, сэтгэцэд нөлөөт эм бэлдмэлээс урьдчилан сэргийлэх ажлыг бусад төрлийн гэмт хэргээс урьдчилан сэргийлэх ажилтай хамт хийх ямар ч боломжгүй. Тийм учраас сургуулийн нийгмийн ажилтанг сургалтад хамруулах мэдээлэл олгох, шаардлагатай тоног төхөөрөмжийг сууриллуулах зэргээр ажиллаж байна. Түүнчлэн эцэг, эхчүүдийн анхаарлыг үүнд хандуулж байна. Сургалтын хөтөлбөрт анхаарч байна. Мөн сошиал болон мэдээллийн хэрэгслээр цацагдаж байгаа контентуудад хяналт тавьж байна.

ГЕГ-ын Гаалийн зөрчилтэй тэмцэх хэрэг бүртгэлийн газрын Хар тамхины хяналтын албаны дарга Б.Сүхбаатар: Энэ төрлийн бодисыг улсын хилээр хууль бусаар нэвтрүүлэх гэсэн оролдлогын 85 хувь нь Замын-Үүд боомтод үйлдэгдсэн. Үлдсэн 20 орчим хувь нь Буянт-Ухаа нисэх онгоцны буудалд гэсэн тоо баримт бий. Харин 2016 оноос хойш энэ төрлийн хууль бус эргэлтийн тээвэрлэлт хэлбэрээ өөрчилсөн. Өөрөөр хэлбэл, олон улсын ачаа тээврээр илгээх зэргээр улсын хил давуулахыг оролдох болсон. Энэ хэрээрээ хууль бус ачаа нийлүүлэх улс орны тоо дагаад нэмэгдсэн. Жишээлбэл, Нидерланд, Норвеги зэрэг улсаас энэ төрлийн хууль бус бараа агуулсан ачаа тээвэр ирэх болсон. Үүнийг хил, гаалийн шалганаар илрүүлж, гэмт үйлдлийг таслан зогсоож байна.