Спорт загварын машинтай машингүй залуус дрифтлэж өөрийн болон бусдын амь насанд эрсдэл учруулах нь ихэслээ. Уг нь дрифтийг зориулалтын замд тусгай зөвшөөрөл авч хийх ёстой. Гэлээ ч сонирхсон хүн бүрт энэ зөвшөөрлийг өгөөд байдаг ч зүйл биш ээ. Учир нь  тухайн хүнээс асар их туршлага, авхаалж самбаа шаарддаг.

Өөрөөр хэлбэл, хэр барагийн хүн дрифт хийх боломжгүй гэсэн үг. Гэтэл шөнийн цагаар дрифт хийж, бусдын амгалан тайван байдлыг алдагдуулах явдал олширч байна. Уг нь юмны учрыг ойлгодог хүнд гашуун сургамж өнгөрсөн хугацаанд гарсан. Хамгийн сүүлийн жишээ татахад энэ оны наймдугаар сарын 29-ний өдрийн шөнийн 03.00 цаг орчим Дүнжингаравын зүүн урд замд хэсэг залуус дрифт эргэж байгаад осолдсоноос гурван хүн газар дээрээ нас барсан харамсалтай хэрэг гарсан юм.

Мөн өчигдөр гэхэд Дүнжингарав худалдааны төвийн урд замд зургаан автомашин дрифт хийж байна гэсэн дуудлагын дагуу цагдаагийн алба хаагчид тус үйлдлийг таслан зогсоосон юм. Хэрэв иргэд энэ талаар мэдээлээгүй байсан бол хүний амь нас сүйдсэнээр дуусах байсныг таашгүй ээ.

Цагдаагийн байгууллагын хэлж байгаагаар Дрифт хийж байгаа иргэдийн автомашинд шалгалт хийхэд ихэнх нь тээврийн хэрэгслийн бүрэн бус байдалтай, яндангаас гарах дуу чимээ стандартаас хэд дахин давсан, дугуй нь гөлгөр зэрэг зөрчлүүд илэрдэг аж.

Дээрх нийтийн эзэмшлийн зам талбайд дрифт хийсэн зургаан жолоочид жолоо барих эрхийг гурван сараас хасч, 50 мянган төгрөгөөр торгууль оногдуулжээ. Гэвч тэдний үйлдэл бусдын амь насыг ч эрсдэлд оруулж болохуйц байсан учраас хариуцлагын тогтолцоог улам л чангаруулах шаардлагатай байна.

Ялангуяа хальтиргаа гулгаа ихтэй энэ үед нийтийн эзэмшлийн зам талбайд дрифт хийх нь хамгийн их эрсдэлтэй. Тиймээс жилд энэ шалтгааны улмаас хэдэн арван хүн хорвоог орхиж байхад бусдын алдаанаас сургамж авдаггүй саваагүй “жаалууд”-ыг номонд нь оруулах цаг болжээ.
 

Б.Лхам