“Эмпати” сургуулиуд болон “Улаанбаатар Элит” олон улсын дунд сургууль АНУ-ын Флорида муж улсын “Florida Gulf Coast University”-тэй хамтран ажиллахаар болжээ. Энэ тухай гэрээнд өнгөрсөн сарын 04-нд хоёр сургуулийн удирдлагууд гарын үсэг зурсан байна.
Хоёр талын байгуулсан энэхүү гэрээний дагуу “Эмпати” сургуулиуд болон “Улаанбаатар Элит” олон улсын дунд сургуулийн төгсөгч нар нь Флорида мужын оршин суугчдийн төлөх төлбөрийн нөхцөлөөр тухайн их сургуульд суралцаж болох юм байна.
Тус сургуулийн төлбөр нь тухайн муж улсын оршин суугчдийн хувьд 6130 ам.доллар байдаг бол гадаад оюутнуудын хувьд 25162 ам.долларын төлбөртэй юм байна. Харин энэхүү гэрээг байгуулснаар “Эмпати” сургуулиуд болон “Улаанбаатар Элит”-ийн төгсөгч нар 6130 ам.доллараар “Florida Gulf Coast University”-д сурах боломж нээгдлээ. Мөн тухайн сургуульд суралцах болзлыг хангасанд сурагчид их сургуулийн кампуст 100% ажиллах боломжоор хангах үүргийг “Florida Gulf Coast University” их сургууль хүлээж байгаа ажээ.
“Florida Gulf Coast University”-ийн тэтгэлэгт хамрагдах боломж “Эмпати” сургуулиуд болон “Улаанбаатар Элит”-ийн бүх төгсөгчдөд нээлттэй юм байна. Тэтгэлэг авах болзол хангасан мөн амжилттай сурч байгаа сурагчдийг тус их сургуулийн honors college-д суралцуулах болсон нь хамтран ажиллах гэрээний бас нэг давуу тал.
Мөн “Florida Gulf Coast university”-ийн боловсрол болон холбогдох чиглэлээр суралцаж байгаа төгсөх ангийн оюутнуудад “Эмпати” сургуулиуд болон “Улаанбаатар Элит” олон улсын дунд сургуульд ирж дадлага хийх боломжийг “Эмпати Ертөнц” ХХК-ийн зүгээс олгож байгаа юм байна.
Дашрамд дурдахад “Florida Gulf Coast university” их сургууль нь 1991 онд байгуулагдсан улсын сургууль бөгөөд 58 бакалаврын хөтөлбөр 25 мастерийн хөтөлбөртэй, 15000 оюутантай, 526 доктор, профессор багштай, далайн эргийн Fort Myers хотод байрладаг ажээ.
Сэтгэгдэл (1)