Засгийн газрын Хэрэг эрхлэх газрын дарга Л.Оюун-Эрдэнээс цаг үеийн асуудлаар тодрууллаа.

-БНХАУ-ын 800 иргэнийг оруулж ирсэн асуудлаар Засгийн газраас шалгалт хийсэн. Шалгалтын талаар хэзээ танилцуулах вэ?

-Хөх хот, Эрээнтэй холбоотой Засгийн газрын шалгалт дууссан. Одоогоор танилцуулагдаж амжаагүй байгаа. Өнгөрсөн даваа гарагт Засгийн газрын хуралдаан болсон. Мягмар гарагт Ерөнхий сайд ОХУ-д айлчлалтай байсан учраас зарим танилцуулагдах байсан гурван асуудал цагтаа багтаагүй. Тиймээс энэ асуудлыг ирэх лхагва гарагт танилцуулахаар төлөвлөсөн. Үүнтэй холбогдуулан авах 7-10 арга хэмжээ бий.  Танилцуулагдаж дууссаны дараа мэдээлэл өгнө.

-Хөдөлмөр эрхлэлтийг дэмжих сантай холбоотой асуудлаар хэд хэдэн гишүүн нэр холбогдоод байна. Энэ талаар Засгийн газраас ямар нэгэн шийдвэр авах уу?

-Хөдөлмөр эрхлэлтийг дэмжих сантай холбоотой асуудлыг АТГ-аас шалгаж байгаа гэж ойлгож байна. Албан ёсоор намын бүлэг, Засгийн газар дээр яригдсан зүйл байхгүй.

-Намын бүлэг дээр яриад гадагшаа задруулж болохгүй гэсэн чиглэл өгсөн гэх зүйл яригдаад байгаа шүү дээ?

-Үндэслэлгүй мэдээлэл. Би байгаагүй.

-Өргөн нэвтрүүлгийн тухай хуулийн төслийг та дэмжих үү?

-Дэмжиж байгаа. Учир нь олон улсын нийтлэг жишгээр оюуны бүтээл үнэлэгдэх нь зөв. Сэтгүүлчид улстөрчдөөс хараат биш байгаасай гэдгийг дэмжиж байна. Хаалтын гэрээ гээд л янз бүрийн асуудал яригддаг. Энэ бол нууц биш. Улстөрчид хэвлэл мэдээлэлд нөлөөлөх гэж хувийг нь худалдаж авдаг. Үүнийг бодлогоор дэмж, энэ хүнийг харлуул гэдэг чиглэл өгдөг нь ч нууц биш. Үүнд эцэслэн цэг тавиасай гэж хүсч байна. Сайн хөтөлбөр хийвэл хэвлэл мэдээллийн байгууллага хэнээс ч үл хамааран санхүүгээ бүрдүүлдэг болох соёл, жишиг бүрддэг болох болов уу.

Б.Лхам