Монгол Улсын Ерөнхий сайд У.Хүрэлсүх ОХУ-д албан айлчлал хийгээд ирсэн билээ. Түүнийг дээрх айлчлалын хүрээнд ОХУ-ын Эрмитаж музейн захирал Михаил Пиотровский XIII зууны Чингисийн чулуун бичгийн хуулбарыг У.Хүрэлсүхэд бэлэглэх тухай яриа гараад байсан. Тэгвэл амалсан ёсоороо түүхийн үнэтэй дурсгалыг Ерөнхий сайдад бэлэглэсэн бөгөөд уг чулуун бичгийг Чингис хааны музейд хадгална гээд улсын түүхтэй холбоотой дурсгалыг нандигнан хадгалсанд баярлалаа гэдгээ Ерөнхий сайд илэрхийлсэн байна.

Чингисийн чулуун бичиг нь ойролцоогоор 1224-1225 оны үеийнх бөгөөд Есүнгэ мэргэний 335 алд газарт бай харван оносон алдрыг дуурсган босгосон хөшөө юм. Хожмоо “Чингисийн чулуун бичиг” хэмээн алдаршсан түүхтэй агаад XIX зуун Өмнөд Сибирийн Хирхира хэмээх газраас олдож, 1936 онд Эрмитаж музейд хүлээлгэн өгсний дараа 2017 онд үнэт металлийг сэргээн засварлах шинжлэх ухааны лабораторид тус дурсгалт олдворын хуулбарыг бүтээжээ.