Эрүүл мэндийн салбарт хууль бус үйл ажиллагаа газар авч улсын эмнэлгүүдэд чанар муутай тоног төхөөрөмж, бүтээгдэхүүн шахаж байгаа талаар "Ази фарм" компаниас баримттай мэдээлэл хийлээ.

Тэдний зүгээс ГССҮТ тендер шалгаруулахдаа үр ашиггүй хууль зөрчсөн үйл ажиллагаа зохион байгуулсан. Мөн Сангийн яамнаас тендерийн үнэлгээг зохих журмын дагуу хийгээгүй, тендерийн үнэлгээг дахин хийх шаардлагыг тавьсан ч үл ойшоон тодорхой нэг компанид давуу байдал өгсөн гэв.

Энэ талаар “Улсын эмнэлэгт хийгдэж байгаа хагалгаа, өндөр өртөгтэй үйлчилгээн дор хууль бус үйл ажиллагаа явагдаад ирэхээр ихээхэн эрсдэл дагуулж эхэлдэг. Үүний хохирогч нь иргэд байдаг. Иргэд Эрүүл мэндийн даатгалын сангаас өөрийн авах ёстой үйлчилгээг авахдаа Эрүүл мэндийн даатгалын сангийн хууль журамтай танилцах, өргөн хүрээний мэдлэгтэйбайх хэрэгтэй. Ингэж байж өөрсдийн эрх ашгаа хамгаалах юм. Мөн эрүүл мэндийн байгууллагын тодорхой удирдлагын түвшний хүмүүс хувийнхаа асуудлыг оруулж, өөрийнхөө дэмжиж байгаа компанийг зүтгүүлэх энэ чиглэлээр явбал дараа дараагийн залуу эмч нарт буруу сургамж өгч байна. Эрүүл мэндийн салбарт тендертэй холбоотой маргаан их гардаг. Уг асуудлыг шийдвэрлэхэд төр захиргааны байгууллага хариуцлагатай ажиллах ёстой гэж харж байна. Тухайлбал, Захиргааны хэргийн анхан шатны шүүх, Сангийн яам нягт ажиллах ёстой.

Чанарын шаардлага хангахгүй, дэлхийн зах зээлээс шахагдаж байгаа төвөнхний болон үений хагалгааны хувьд иргэн хагалгаа хийлгэсний тухайн эрхтий хөдөлгөөн хоригдох, металлын хордлого бий болох, цус бохирдох, идээ татах улмаар уг эмчилгээг дахин хийлгах шаардлага тулгардаг юм. Тиймээс монгол хүний эрүүл мэндийн төлөө зөрчигдөж байгаа асуудлыг гаргаж ирж, зөв гольдрилд нь оруулбал эмчилгээний горим зөв хөгжих юм. Дэлхийн хэмжээний стандарт Монгол Улсад нутагшихад бидний оролцоо чухал” гэдгийг уриаллаа.