УИХ-ын гишүүн Н.Номтойбаяр Жинхэнэ монгол морь, Монголын морин спорт уяачдын холбоо байгуулжээ. 2015 оны аравдугаар сарын 26-нд улсын бүртгэлд бүртгүүлж, тамга тэмдгээ авсан эл холбоог үүсгэн байгуулагчид нь Н.Номтойбаяр, Н.Цэрэнбат, П.Батхүлэг, З.Мэндсайхан, О.Алтансүх нарын таван хүн байгааг Бүртгэл.мн хуудаснаас харж болно. Н.Цэрэнбат гэдэг нь одоогийн Байгаль орчин, аялал жуулчлалын сайд. Тэрбээр энэхүү холбоог байгуулах үедээ Сангийн яамны Төсвийн хяналт, Эрсдэлийн удирдлагын газрын даргаар ажиллаж байжээ.

Харин Монгол адууны генийг хамгаалах, удмын санг судлах, эрдэм шинжилгээ судалгааны ажил хийхэд дэмжлэг үзүүлэх, морины уралдаан наадам зохион байгуулах зорилго бүхий холбооны Удирдах зөвлөлийн даргаар өдгөө гишүүн Н.Номтойбаяр ажилладаг юм.

Сонирхолтой нь, Н.Номтойбаяр нарын хүмүүс уг холбоог үүсгэн байгуулснаасаа хойш хурдан морьтой ямар үйл ажиллагаа зохион байгуулсан нь өнөөг хүртэл тодорхойгүй явж иржээ. Энэ талын мэдээлэл ч хомс, бараг алга.

Угтаа бол улс төр, бизнесмэн, сайд, дарга уяачдын хамгийн том нэгдэл болсон Монголын морин спорт, уяачдын холбоо гэж бий. Г.Баттөмөр, Д.Даваахүү, А.Баярмагнай, Г.Пунцагбалжир, Э.Ганбат нарын таван хүн эл холбоог 1995 оны тавдугаар сарын 25-нд анх үүсгэн байгуулсан байдаг. Түүнээс хойш Төрийн их баяр наадам, Бүсийн томоохон хурдан морины уралдааныг зохион байгуулахад уг холбоо голлох нөлөөтэй оролцож ирсэн. Одоо ч оролцож буй.

Саяхныг хүртэл УИХ-ын дарга асан М.Энхболд удирдаж байгаад өөрийн хүсэлтээр үүрэгт ажлаа хүлээлгэн өгсөн.

Тийм байхад гишүүн Н.Номтойбаяр Жинхэнэ монгол морь, Монголын морин спорт уяачдын холбоо байгуулсны гол зорилго нь юу байв гэдэг нь анхаарал татаж байгаа юм. Магадгүй эрлийз болон монгол адууг ялгаж уралдуулах ёстой хэмээх маргааныг нэг талд нь гаргахад Н.Номтойбаяр нар санаачилга гаргаж ажиллахаар ийн холбоо байгуулсныг үгүйсгэхгүй.

Гагцхүү үнэхээр Монгол адууны генийг хамгаалах, удмын санг судлах зорилгоор ТББ байгуулсан нь, Удирдах зөвлөлийн даргаар ажилладаг нь үнэн л юм бол Н.Номтойбаяр гишүүн өөрөө ил гарах ёстой биш гэж үү?.

Өдгөө Х.Болорчулуун нарын УИХ-д өргөн барьсан Үндэсний баяр наадмын тухай хуулийн төслийг Байнгын хорооны хуралдаанаар хэлэлцэхээр болоод буй. Үүнтэй холбогдуулж зарим уяач хуулийн төслийг эсэргүүцэж, түрүүчээсээ байр сууриа илэрхийлж эхэлсэн. Сүүлд Монголын үндэсний морин, спорт уяачдын холбоо нэртэй ТББ-аас хуулийн төслийг эсэргүүцэж буйгаа мэдэгдсэн. Нэгэнт хэлэлцэх асуудлын дараалалд оруулсан бол хуулийн төслийг хэлэлцэж, мухарлаж л таарна. Эсвэл хууль санаачлагчид нь буцаана. Тэр нь УИХ дахь уяач гишүүдийн эрх ашиг, үзэмжээс хамаарах нь тодорхой. Харин тэр үед гишүүн Н.Номтойбаяр, Жинхэнэ монгол морь, Монголын морин спорт уяачдын холбоо ямар санал санаачилга гаргах нь анхаарал татаж байна.

Г.Эрхэс