Үндэсний статистикийн хорооноос өнгөрсөн сард гарсан нийгэм, эдийн засгийн байдлын талаар мэдээлэл хийлээ.

Тодруулбал, Цаг уур, орчны шинжилгээний газрын мэдээгээр өнгөрсөн арваннэгдүгээр сард орсон хамгийн их хур тунадасны нийлбэр Увс аймгийн Малчин суманд 31.1 мм-т хүрсэн байна. Агаарын үнэмлэхүй их температур Ховд аймгийн Дарви суманд +17.6 хэм, үнэмлэхүй бага температур Завхан аймгийн Баянтэс болон Цэцэн-Уул суманд -39.0 хэмд хүрлээ. Үнэмлэхүй их салхины хурд Говь-Алтай аймгийн Шарга сумын нутгаар түр зуур 28 м/с-д хүрсэн байна.

Улаанбаатар хотын агаар дахь бохирдуулагч бодисын дундаж агууламж 2019 оны арваннэгдүгээр сард өмнөх оны мөн үеэс хүхэрлэг хий 0.028 мг/м3 буюу 82.5 хувь, азотын давхар исэл 0.007 мг/м3 буюу 15.9 хувиар тус тус их байсан бол РМ10 тоосонцорын агууламж 0.084 мг/м3 41 хувь, РМ2.5 тоосонцорын агууламж 0.048 мг/м3 43.9 хувиар тус тус бага байсан байна.