Архангай аймгийн Тариат сумын Алтаад багийн малчин Э-гийн хотонд чоно орж иржээ. Улмаар аргамжаатай морь руу нь ноцож, нохойтой нь ноцолдсон үеэр гэрийн эзэн буудаж устгасан байна. Энэ тухай мэдээлэл энэ сарын 13-нд 20:20 цагийн үед тус аймгийн Зоонозын төв болон Мал эмнэлгийн газарт ирсэн байна. Малчин Э-гийн гарт чоно хүрсэн тул өдгөө сумын эмнэлэгт вакцин болон шаардлагатай эмчилгээ хийлгэж байгаа гэнэ.
Чонын сэгээс энэ сарын 14-ний оройн 23.00 цагийн үед дээж авч, Архангай аймгийн Мал эмнэлгийн лабораторийн шинжилгээнд өгөхөд урьдчилсан байдлаар галзуугийн шинж тэмдэг илэрч, улсын лабораторийн шинжилгээнд баталгаажуулахаар явуулсан байна.
Тариат сумын ажлын хэсэг, Архангай аймгийн Мал эмнэлгийн газар, Зооноз өвчин судлалын төв, Онцгой байдлын газрын бүрэлдэхүүн малчны хотонд очиж, шархадсан мал, нохойг устгах, малыг вакцинжуулах ажил хийж байгаа юм байна.
