Олон жил улстөрчдийн сонгуулийн шоунд ашиглагдаж, тэдний төрийн  эрхэнд гарах гишүүр болж ирсэн нэгэн хэрэг бол төр, нийгмийн зүтгэлтэн С.Зоригийн амь насаа алдсан хэрэг. Хэрэг гарснаас хойш 21 жил өнгөрсөн. Энэ хугацаанд Дамрингийн Энхбатаас эхлээд нэр холбогдсон болгон амиа алдсан, алуулсан гэж попрох нь олон. Нэгэн үе гэмт этгээдүүдийг илрүүллээ гээд гурван иргэнийг ялласан, цагдан хорьсон. Захиалагч илэрсэн, зарласан гэхийн даваан дээр хэрэг илрүүлсэн нөхдүүд нь эрүүдэн шүүдэг тамлагч нэр зүүсэн. Удалгүй ялтан нэр зүүгээд байсан Т.Чимгээ, Б.Содномдаржаа нарыг хохирогч хэмээгээд өнөө маргаашгүй суллах ёстой гэж өрөвдөж, хайрласан энэрэнгүй хүмүүс захаас аваад нэг болсон. Тиймдээ ч тэдний өмгөөлөгчөөр нь гомдол гаргуулж, УЕП-д хүргүүлэв.

Энэ бол С.Зоригийн амь насаа алдснаас хойшхи 21 жилийн хугацаанд өрнөсөн үйл явдал. Өрнөсөн үйл бүхэн тавилттай жүжиг мэт харагдаж, тэр хэрээрээ олны илтгэл алдарч эхэлсэн.

Ийм л процесс дунд ялтан Т.Чимгээ, Б.Содномдаржаа нарыг сулла, суллахгүй бол гудамжинд гарч тэмцэхээ амлаад буй улстөрчдийн төлөөлөл нь УИХ-ын гишүүн Ж.Батзандан, Л.Болд нар. ШИНЭ нам гэгчийг байгуулснаас хойш өөрсдийгөө ШУДАРГА таван гишүүний нэгээхэн хэсэг нь гэж зарлаж, бүр орон нутаг дахь уулзалтын үеэрээ хүртэл ийн лоозондуулж, “ПИ АР”-дах болов. Сонгууль ойртсныг тэд ийн сануулах зуураа иргэний нийгмийн гэх хэдэн нөхдийг урдаа барин өнөө л поп сэдвээ сэвэх болов.

Энэ үүднээс Улсын Ерөнхий прокурорын газрын үүдийг үе үе гороолж, “хэлмэгдсэн” гэх хүмүүсийг суллахыг шахаж, шаардав. Эцэстээ ялтан Т.Чимгээ, Б.Содномдаржаа нарт холбогдох хэргийг анхан шатны шүүхэд буцаасан гэх мэдэгдлийг иргэний нийгмийн гэх нөхөд мэдэгдэж, олон нийтийг төөрөгдүүлээд амжив. Тэгвэл С.Зоригийн амь насыг хөнөөсөн хэрэгт буруутгагдаж, ял эдэлж буй ялтан Т.Чимгээ, Б.Содномдаржаа нарт холбогдох хэрэг анхан шатны шүүхэд шилжсэн үү.

Үүнийг холбогдох бүхий л газраас тодрууллаа. Гэтэл тийм зүйл хараахан өрнөөгүй. Тэгээд ч иргэний нийгмийнхэн, эсвэл хэн нэгэн УИХ-ын гишүүн шахаж, шаардаж айлган сүрдүүллээ гээд шүүхийн шийдвэрийг хүчингүй болгочихдоггүй гэв.

Өөрөөр хэлбэл, ялтан Т.Чимгээ, Б.Содномдаржаа нарын гэм буруутай эсэхийг дахин шүүхийн эхлээд Улсын Дээд шүүхийн Ерөнхий шүүгч дүгнэлт бичих эсвэл Улсын Ерөнхий прокурор эсэргүүцэл бичсэн байх ёстой юм байна. Эдгээр боломжоос Дээд шүүхийн Ерөнхий шүүгч дүгнэлт бичих боломж нь нээлттэй. Гэхдээ Т.Чимгээ, Б.Содномдаржаа нарын өмгөөлөгч нь прокурорт гомдол гаргасны дагуу УЕПГ-аас нийслэлийн Прокурорын газрын хяналтын прокурорт дээрх гомдлыг шилжүүлсэн аж. Эндээс прокурор шинээр илэрсэн нөхцөл байдлын талаар хэрэг нээж, тогтоол гаргаж шалгах учиртай. Хэрвээ үнэхээр шинээр илэрсэн нөхцөл байдал тогтоогдлоо гэвэл Улсын Дээд шүүхэд дүгнэлт бичиж хүргүүлсний дагуу Дээд шүүхийн Хяналын шатны шүүхийн Эрүүгийн хэргийн шүүгчдийн нэгдсэн хуралдаан болно. Уг хурлаас хэргийг прокурорт буцаах, эсвэл хяналтын шатны  шүүхийн шийдвэрийг хүчингүй болгох эсвэл бүр прокурорын дүргнэлтийг хүчингүй болгох зэргээр шийдвэр гаргах нь тухайн шүүгч нарын бүрэн эрхийн асуудал юм. Одоогийн байдлаар өмгөөлөгчийн гаргасан гомдлыг нийслэлийн Прокурорын газарт харъяалалын дагуу Улсын Ерөнхий прокуророос хуваарилсан. Үүний дагуу үнэхээр шинээр илэрсэн нөхцөл байдал тогтоогдох эсэхийг нягтлахаар хяналтын прокурор ажиллаж байгаа.

Ингээд тооцвол ялтан Т.Чимгээ, Б.Содномдаржаа нарт холбогдох хэрэг анхан шатны шүүхэд шилжсэн гэдэг нь худлаа болж таарах нь.

Ер нь сүүлийн жилүүдэд сошиль хөгжихийн хэрээр хууль хяналтын байгууллагын ажилд хөндлөнгөөс нөлөөлөх, тэр бүү хэл, шүүхийн шийдвэрт шууд утгаараа нөлөөлөх гэсэн хандлага ихсэх болов. Тэр дундаа олон нийтийн эсэргүүцэл идэвхжихийн хэрээр тэдний санаа сэтгэлд нийцсэн шийдвэр гаргаж, асуудлыг намжаах гэсэн тал ажиглагдах болсон нь үнэхээр гэмгүй хүн хэлмэгдэж, эрсдэх вий гэж болгоомжлоход хүргэж байна. Тиймээс л иргэний нийгмийн нэртэй их мэдэгдчидийг урдаа барьсан нэр бүхий УИХ-ын гишүүд хэлж ярих зүйлдээ цензуртай хандахгүй бол энэ мэтчилэн олон нийтийг төөрөгдүүлж, талцуулах явдал тасрахгүй бололтой.

Г.Нацаг