УИХ-ын Эдийн засгийн байнгын хорооны хуралдаанаар Засгийн газраас өргөн барьсан ахмадуудын зээлийг нэг удаа тэглэх хуулийн төслийг хэлэлцэж байна. Хэлэлцэж байгаа асуудалтай холбогдуулан Хөдөлмөр, нийгмийн хамгааллын сайд С.Чинзориг “Тэтгэврээс өөр орлогогүй иргэд зээл авснаар хүүгийн дарамтад өртөх, ядууралд өртөх, зайлшгүй шаардлагатай орлогийн эх үүсвэргүй болоход хүрч байна. Тиймээс тэтгэврийн зээлийн дарамтаас ангижруулахын тулд зээлийн хүүг бууруулах ажлыг үе шаттай хийж ирсэн. Өнөөдрийн байдлаар жилийн хугацаатай тэтгэвэр барьцаалсан зээлийн хүү жилийн 10 хувь, хоёр жил 15.6 хувийн хүүтэй байна.

ҮАБЗ-өөс Салхитын мөнгөний ордыг эдийн засгийн эргэлтэд оруулах замаар тэтгэврийн зээлийг нэг удаа тэглэх зөвлөмж гаргасан. Энэ дагуу хуулийн төсөл боловсруулсан.

Төсөлд НДСангаас болон Цэргийн алба хаасны тэтгэвэр авагчийн зээлийн үлдэгдэл төлбөрийг төлөх харилцааг зохицуулахаар тусгасан” гэдгийг онцолсон.

Харин УИХ-ын гишүүн Л.Болд “Засгийн газар нэг бол хуулийн төслөө татаж ав. Эсвэл зөвшилцлийн Ажлын хэсэг байгуулах хэрэгтэй. Тэтгэвэр авч байгаа иргэдийг зээл авсан, аваагүйгээр нь ялгаварлаж болохгүй. Үүнийг ШИНЭ нам эрс эсэргүүцэж байна. Хуулийн төсөлд эрх зүйн маш том дутагдал байна. Ахмадуудын дахин зээл авах бүх эрхийг банз хааж байна. Тэд өөрийнхөө мөнгийг авч байгаа. Үүнийг нь төр зохицуулж байгаа зүйл" гэв.

С.Сүлд