Нийслэлийн цагдаагийн газрын мөрдөн шалгах хэлтсээс мал хулгайлахдаа ашиглаж байсан автомашин, техник хэрэгслүүдийг хураалаа. Тодруулбал, өнгөрсөн 2019 оны тавдугаар сараас хойш зохион байгуулалттайгаар бүлэглэн бусдын мал хулгайлдаг, орон байсан бүлэг этгээдийг энэ сарын 7-ны шөнө цагдаагийн байгууллагаас баривчилжээ. Эдгээр 11 этгээд өнгөрсөн хугацаанд 20-35 тооны бод малыг 6-8 удаагийн үйлдлээр хулгайлж, бэлчээр дээр нь нядалж, ченжүүдэд худалдсан нь тогтоогдсон байна.

Эдгээр 11 гэмт этгээд нь малчдад 100 гаруй сая төгрөгийн хохирол учруулсан  нь одоогоор тогтоогдоод байгаа бөгөөд цагдаагийн байгууллагаас хэргийг үргэлжлүүлэн шалгаж байна.

Гэмт хэрэгт холбогдсон зарим иргэдийн хэлснээр “Дугуй хагарчихлаа гэж найз залгасан. Би очсон. Очоод дугуй өгөхөд шуудайтай юм өгсөн. Ийм зүйл гэдгийг мэдээгүй. Би өмнө нь хулгайн хэргээр ял эдэлж байгаад 2015 онд суллагдсан. Түүнээс хойш дахиж ийм хэрэг хийгээгүй. Цайны газарт ажилладаг. Амьдралаа залгуулахын тулд ажиллаж хөдөлмөрлөж байна. Гэтэл бусдын гуйлтад тусалсныхаа төлөө ийм хэрэгт холбогдчихлоо. Тусламж гуйсан хүмүүсийн хувьд өмнө нь хамт ял эдэлж байсан хүмүүс. Тусламж гуйхаар нь үгүй гэж хэлж чадаагүй. Намайг буруутай эсэхийг хуулийн байгууллага шалгаж тогтоох байх. Би хулгай хийгээгүй" гэсэн юм.

Харин өөр нэг сэжигтэн нь нэг удаа жолоо барихаар очсон гээд "Би буруугүй, тусалсныхаа төлөө хэлмэгдчихлээ” гэлээ.

Түүнчлэн дээр сэжигтнүүд нь тэд алт, мөнгө зэрэг үнэт эдлэлүүдийг хулгайлан борлуулж байсан нь ч тогтоогджээ.

НЦУГ-ын МШГ-ын Хулгайлах гэмт хэрэг мөрдөн шалгах хэлтсийн мөрдөн байцаах тасгийн дарга, дэд хурандаа М.Болдбаатар “Эдгээр сэжигтнүүд дээрх малын хулгайгаас гадна Сонгинохайрхан, Чингэлтэй, Баянзүрх дүүрэгт орон байрны хулгай хийдэг байсан бүлэг этгээд байгаа юм. Нийт 100 гаруй сая төгрөгийн хохирол учруулсан гэдгийг урьдчилсан байдплаар тогтоосон. Шалгалтын явцад зүйл анги нь өөрчлөгдөх байх. Гэхдээ хулгайлах гэмт хэрэг учраас дээд тал нь 12 жилийн хорих ялтай” гэлээ.

Г.Эрдэнэ