УИХ-ын чуулганы нэгдсэн хуралдаанаар Сонгуулийн ерөнхий хорооны гишүүдийг чөлөөлж, томилох тухай асуудлыг хэлэлцэж баталлаа. Энэ хүрээнд Д.Эрдэнэчулуун, Н.Дагва, Б.Билэгт нарыг Сонгуулийн ерөнхий хорооны орон тооны гишүүнээс чөлөөлж, Г.Байгальмаа,  Э.Батболд,  Д.Баяндүүрэн, Б.Ганбат, О.Амгаланбаатар нарыг томилсон юм.

Сонгуулийн ерөнхий хорооны гишүүнээс чөлөөлөгдсөн бригадын генерал Б.Билэгтийн тухайд өмнө нь Цагдаагийн ерөнхий газрын даргаар ажиллаж байсан нэгэн.

Түүнийг салбарынхаа сайдынхаа эсрэг гүйцэтгэх ажиллагаа явуулсан гэх үндэслэлээр үүрэгт ажлаас нь чөлөөлсөн ч удалгүй тэрбээр ШШГЕГ-ын даргаар томилогдож байв.

Түүний хувьд 2018 онд АТГ-д хөрөнгө орлогын мэдүүлгээ өгөхөөс татгалзаж байсан юм. Харин түүний оронд очсон Г.Байгальмаагийн хувьд өдгөө Ерөнхийлөгчийн Тамгын газрын даргаар ажилладаг нэгэн. Тэрбээр МоАХ-ны Удирдах Зөвлөлийн гишүүн, АН-ын ҮЗХ-ны гишүүн, Ардчилсан эмэгтэйчүүдийн гүйцэтгэх зөвлөлийн гишүүн, УИХ-ын даргын зөвлөх, дэд сайдаар ажиллаж байсан туршлагатай.

С.Сүлд