Ахмадуудын тэтгэврийн зээлийг нэг удаа тэглэх тухай хуулийн төслийг УИХ-ын чуулганаар хэлэлцэж, зургаа хүртэлх сая төгрөгийн зээлийг нэг удаа тэглэх, тэтгэвэр барьцаалсан зээл аваагүй ахмадуудад нэг сая төгрөгийн үнэт цаас олгох саналыг дэмжсэн. Эдийн засгийн болон Нийгмийн бодлого, боловсрол, соёл, шинжлэх ухааны байнгын хорооны өнөөдрийн хамтарсан хуралдаанаар уг асуудлыг хэлэлцээд мөн дэмжиж, 2020 оны тавдугаар сарын 1-ний өдрөөс өмнө үнэт цаасыг мөнгөжүүлэх, хэрвээ энэ хугацаанаас өмнө нас барсан ахмадуудын үнэт цаасыг үр хүүхдүүдэд нь өвлүүлэх асуудлыг хэлэлцэж дэмжсэн юм. 

Уг асуудлаар УИХ-ын гишүүн Д.Пүрэвдорж "Тэтгэвэр барьцаалсан зээл аваагүй иргэдэд нэг сая төгрөгийг цагаан сараас өмнө өгчих гэдэг саналыг би оруулсан. Монголбанкны хувьд бондыг мөнгөжүүлэх боломж бүрэн бий. Яагаад гэвэл дөрвөн тэрбум ам.долларын валютын нөөцтэй. Энэ нь 11 их наяд төгрөг гэсэн үг. Бонд нь зургаан хувийн хүүтэй гэхээр нийт зардал нь 16 тэрбум 480 сая төгрөг. Энэ мөнгийг бонд дээрээ нэмэх байдлаар зардал болгож гаргах боломжтой. Нэгэнтээ л ахмадууддаа хувь хүртээх гэж байгаа юм бол 194 мянган ахмадуудад нэг сая төгрөгийг нь олгочих" гэлээ.

Г.Алимаа