Монгол Улсын Ерөнхийлөгч Х.Баттулга өнгөрсөн 2019 оны зургадугаар сард 17 шүүгчийн бүрэн эрхийг түдгэлзүүлсэн билээ. Харин дээрх 17 шүүгчийн долоогийнх нь бүрэн эрхийг сэргээх саналаа Шүүхийн Ерөнхий зөвлөлөөс Ерөнхийлөгч Х.Баттулгад хүргүүлсэн байна.

Энэ дагуу Ерөнхийлөгч Х.Баттулга дээрх шүүгч нарыг албан тушаалд нь эгүүлэн томилох тухай зарлигийг энэ сарын 10-нд гаражээ.

Тодруулбал, нэр бүхий 17 шүүгч буюу тэдгээрийн дотор Улсын дээд шүүхийн Иргэний танхимын тэргүүн Х.Сонинбаяр, шүүгч П.Золзаяа, нийслэлийн Иргэний хэргийн давж заалдах шатны шүүхийн ерөнхий шүүгч Ж.Оюунтунгалаг, шүүгч Д.Дэлгэрцэцэг, Д.Байгалмаа, Б.Нармандах болон Баянзүрх дүүргийн Иргэний хэргийн анхан шатны шүүхийн шүүгч Т.Энхжаргал нарыг Салхитын мөнгөний ордын хэрэгт холбогдуулан АТГ-аас шалгаж эхэлсэн юм. Эндээс гэм буруугүй гэж үзсэн анхан, давж заалдах болон Улсын дээд шүүхийн эдгээр долоон шүүгчийн бүрэн эрхийг сэргээх саналаа Шүүхийн ерөнхий зөвлөлөөс Ерөнхийлөгчид ийн уламжилсан байна. 

Салхитын ордын тусгай зөвшөөрлийг эзэмшигчдийн маргааныг шийдвэрлэхдээ хээл хахууль авсан гэх үйлдэлд Улсын дээд шүүхийн Иргэний хэргийн танхимын шүүгч Д.Цолмон, Г.Цагаанцоож, Ц.Амарсайхан, Захиргааны хэргийн давж заалдах шатны шүүхийн шүүгч Э.Халиунбаяр, Сонгинохайрхан дүүргийн Иргэний хэргийн анхан шатны шүүхийн ерөнхий шүүгч Б.Цолмонбаатар, Чингэлтэй дүүргийн Иргэний хэргийн анхан шатны шүүхийн ерөнхий шүүгч Б.Сайханцэцэг нарыг буруутган яллах дүгнэлт үйлдэж, Хан-Уул дүүргийн Эрүүгийн хэргийн анхан шатны шүүхэд шилжүүлээд байгаа бол эрүүл мэндийн шалтгаанаар хил давсан шүүгч Ц.Амарсайханы хэргийг тусгаарласан юм.

Дээрх шүүгч нараас гавъяат хуульч асан Л.Бямбаагийн хүү буюу нийслэл дэх Захиргааны хэргийн анхан шатны шүүхийн шүүгч асан С.Төмөрбат ОХУ-аар дамжин АНУ руу оргон зайлсан. Түүнийг Монголд шилжүүлэн авах эсэхийг шийдэх шүүх хурал ирэх тавдугаар сард Америкт болох тухай бид өмнө нь мэдээлсэн. Хэрвээ шүүх хурлаас хэрэгтэн шилжүүлэхийг зөвшөөрсөн шийдвэр гаргавал С.Төмөрбатыг Монголд авчрах боломжтой болох юм.

Г.Маргад