НОБГ, НМХГ-аас сайжруулсан шахмал түлшний хэрэглээний талаар мэдээлж байна.

НОБГ-ын Гамшгаас урьдчилан сэргийлэх хэлтсийн дарга, хурандаа Г.Нэргүй “Түүхий нүүрс зэрэгт тавих хөдөлгөөнт хяналт, шалгалт ирэх дөрөвдүгээр сар хүртэл явагдахаар боллоо. Энэ хүрээнд нийслэлийн төвийн зургаан дүүргийн 386 түлш түгээх цэгүүдэд алба хаагчид хамтран ажиллана. Мөн энэ долоо хоногоос туулах чадвар сайтай автомашинаар иргэдэд түлш хүргэх ажлыг зохион байгуулна.

Түүнчлэн угаарын хийн мэдрэгчийг энэ долоо хоногоос албан ёсоор суурилуулах бөгөөд эхний 20 мянган айл өрхөд тараана. Тодруулбал, Хан-Уул дүүрэгт 1285 өрх, Баянзүрх дүүрэгт 5000 өрх, Чингэлтэй дүүргэд 3400 өрх, Баянгол дүүрэгт 1420 өрх Сонгинохайрхан дүүрэгт 6930 өрх, Сүхбаатар дүүрэгт 1902 өрхөд эхний ээлжид тараана.

Дохиоллыг суурилуулахдаа унтлагын өрөөндөө байрлуулах шаардлагатай. Бусад өрөөнд суурилуулах бол дуу нь хэр зэрэг дуугарч байгааг шалгах хэрэгтэй. Мөн дохиоллыг суурилуулахдаа мэдрэгчийг гарааш, зуухны өрөө, угаалгын өрөө зэрэгт суурилуулж болохгүй” гэлээ.

Өнгөрсөн амралтын өдрүүдэд яаралтай түргэн тусламжийн төвд 12 өрхийн 32 иргэн дуудлага өгч эмнэлгийн тусламж үйлчилгээг авчээ. Одоогийн байдлаар угаарын хийн хордлогын оноштой нэг хүүхэд хэвтэн эмчлүүлж байгаа аж.

Б.Лхам