БСШУС-ын сайд Ё.Баатарбилэг цаг үеийн асуудлаар мэдээлэл хийлээ.

-“Монгол Тэмүүлэл” сургууль болон 133 дугаар сургуулийн маргааныг хэрхэн шийдвэрлэж байна вэ. Энэ талаар мэдээлэл өгөхгүй юу?

-Худалдаа үйлдвэрлэлийн дээд сургуулийн нэг корпуст засвар үйлчилгээ хийсэн. Үүнтэй танилцлаа. Дээрх сургуулиудад холбогдох маргаан жил гаруйн хугацаанд үргэлжилж байна. Тус хичээлийн байранд хоёр сургуулийн 4000 гаруй сурагч хичээллэж байна. Тиймээс олон улсын стандарттай цөөн хүүхэд хичээллэж байгаа сургуульд шилжүүлэн шинэ хичээлийн байртай болгохоор зураг төсөл хийсэн. Улсын төсөвт шинэ хичээлийн байрны зардал суугдсан. Газар нь шийдэгдсэн. Шинэ хичээлийн байр 640 хүүхдийн суудалтай. “Монгол Тэмүүлэл” сургууль одоогоор Х, ХI, ХII ангийн сурагчдыг элсүүлж авч байгаа бол хичээлийн байртай болсноор VI ангиас нь эхлэн элсүүлэх боломж бүрдэх юм. Кембриджийн стандарттай сургуулиа улам өргөжүүлнэ. Барилгын ажил ирэх хаврын улиралд эхэлнэ.

-Драмын театр зэрэг барилгыг шинэчлэх ажил юу болсон бэ?

-УДБЭТ, Драмын театр, Төв номын сангийн барилгын газрыг нь авч зарж, идэх гэж байгаа юм шиг гүтгэн гуйвуулж, улстөржүүлж, суулт тэмцэл өрнүүлж байгаа учраас уг ажлыг зогсоосон. Энэ байр суурь дээрээ хэвээр байгаа.

Дээрх гурван барилгын удирдлагуудаас маш хэрэгтэй хөрөнгө оруулалтыг зогсоох гэж байна. Сүүлийн хэдэн жил соёл урлагт ийм хөрөнгө оруулалт ороогүй. Уран бүтээлчдийн ажиллах нөхцөлийг сайжруулах хэрэгтэй. Тиймээс барилгын ажлыг шинэчлэх асуудлыг хэвээр үлдээж өгөөч гэсэн хүсэлт удирдлагуудаас нь өгсөн. Барилгыг ажлыг шинэчлэхэд улсын төсөвт тус бүр хоёр тэрбум төгрөг суугдсан. Тиймээс уг мөнгөөр барилгыг шинэчилж, засварлана. 2021 онд Ардын хувьсгалын 100 жилийн ой болно. Үүнээс өмнө гурван соёл урлагийн байгууллагаа засварлана. Мөн тоног төхөөрөмжүүдээ сайжруулна. Олон жил санхүүжилтгүйн улмаас орхигдсон байсан салбарт 2019, 2020 онуудад харьцангуй сайн төсөв суугдсан. Үүнийг битгий улстөржүүлээч гэж зарим нөхдөөс хүсмээр байна.

-Мэргэжлийн сургалт олгох төвүүд олширч, иргэдийг залилах болсон гэх мэдээлэл гарах боллоо. Яамны зүгээс энэ тал дээр хэрхэн ажиллаж байна вэ?

-Энэтхэгийн их сургууль ч гэдэг юм уу, маш олон сургалтын газар үйл ажиллагаа явуулж байна. Диплом, ромбо олгоно зэргээр олон нийтийг төөрөгдөлд оруулж, хуулийг цоорхойг ашиглан хохироож байна. Ялангуяа тодорхой мэргэжлийн болон диплом, зэргийн боловсрол олгодог мэргэжлүүдээр зүгээр нэг дамжаа хичээллэх зөвшөөрөлтэй газрууд диплом, ромбо олгох зэргээр залилан хийх болсон юм болов уу. Тиймээс өнгөрсөн аравдугаар сард ХНХЯ-тай хамтран шалгалт явуулж, тодорхой газруудад албан бичиг хүргүүллээ. Их сургууль, дээд сургууль нэртэй зөвшөөрөл аваад олон нийтийг төөрөгдүүлэх явдал их байна. Эдгээрийг эргэж хараач гэдэг асуудлыг Улсын бүртгэлийн ерөнхий газарт тавьсан. Мэргэжлийн сургалт үйлдвэрлэлийн төвүүдэд цэцэрлэгийн багшаас эхлээд боловсролын байгууллагын ажилтнуудыг бэлтгэж байна. Тийм зүйл байх ёсгүй. Багшийн сургууль бэлтгэдэг сургуулийн дэргэдэх тусгай курсийг нэг жил хүртэлх хугацаатай сурч байж олгох ёстой. Учир нь 14 хоног хүртэлх хугацаанд сургаад цэцэрлэгийн туслах багш гэсэн үнэмлэх олгож байна. Энэ асуудлаар ХНХЯ-нд хандсан. Мөн холбогдох хууль хяналтын байгууллагад хандана.

-Дээрх асуудлын хүрээнд үүсгэдэг бодит хохирол нь юу байдаг юм бэ?

-Дээрх газруудад тодорхой мөнгө төлж сурч байгаа шүү дээ. Төгсөөд тухайн мэргэжлээрээ суралцъя гэхээр диплом, ромбо нь хүлээн зөвшөөрөгддөггүй юм. Мэргэжлийн сургалт үйлдвэрлэлийн төвүүд мэргэжлийн сертификат олгодог. Гэтэл ромбо диплом олгох байгаа асуудал гарч байгаа учраас болгоомжлохыг анхааруулж байна.

-Өнгөрсөн долоо хоногт цахим сүлжээгээр Чингис хааны онгон олдсон байж болзошгүй мэдээлэл цацагдсан. Ийм мэдээлэл боловсролын яаманд хэр их ирдэг вэ?

-Бидэнд албан ёсоор мэдээлэл ирээгүй байна. Эхлээд Шинжлэх ухааны академид мэдээлэл ирээд дараа нь авран хамгаалах ажиллагаа явагдах ёстой. Шинжлэх ухааны академи энэ талаар мэдээлэлгүй байна гэсэн.

-Сурагчдыг амраахгүй хичээллүүлж байна, сурагчдад зүй бус бичлэг үзүүлсэн талаарх мэдээлэл мөн цахим сүлжээгээр явсан. Энэ үнэн юм уу?

-Энэ талаар “English school of mongolia” ажлын хэсэг тухайн сургуульд ажилласан. Сурагчдыг одоог хүртэл амраахгүй хичээллүүлж байна гэсэн. Ажлын хэсгийн шалгалтаар сурагчид амарч байсан. Мөн хоёрдугаар улирлын амралтаар нь эцэг, эхийнх нь зөвшөөрлөөр цөөн тооны хүүхдүүдэд сургалт явуулдаг юм байна. Энэ сургалт нь хэвийн явж байсан. Зүй бус бичлэг үзүүлсэн асуудал байхгүй бөгөөд хууль хяналтын байгууллагаар шалгуулж байгаа гэсэн.

 Б.Лхам