Төрийн албаны зөвлөлийн 2020 оны 01 дүгээр сарын 10-ны өдрийн 02 дугаар хуралдаанаар БОАЖЯ, ГХЯ, Сангийн яам, ХЗДХЯ, БХБЯ, БХЯ, БСШУСЯ, ЗТЯ, ХХААХҮЯ, ХНХЯ, ЭМЯ, УУХҮЯ зэрэг нийт 12 яамны Төрийн нарийн бичгийн дарга нарын албан тушаалын тодорхойлолтыг хянан, хэлэлцсэн билээ.

Энэ удаагийн хуралдааны төгсгөлд Төрийн албаны зөвлөлөөс, яамдын Төрийн захиргаа удирдлагын газрын дарга нарт хэд хэдэн чиглэлээр үүрэг, даалгавар өгсөн юм.

Үүнд, нэгдүгээр сард багтаан өөрсдийн яамны эрхлэх асуудлын хүрээнд тодорхой байгууллагуудын үйл ажиллагаатай танилцаж, үнэлэлт, дүгнэлт хийн Төрийн албаны зөвлөлд ирүүлэх. Мөн Төрийн албаны тухай хуулийн 22 дугаар зүйл, Төрийн албан тушаалд тавигдах нийтлэг шаардлагын 22.1.3-т зааснаар Эрүүгийн хуульд заасан авилга, албан тушаалын гэмт хэрэг үйлдэж шүүхээр ял шийтгүүлж байгаагүй байх хэмээн заасан байдаг. Уг хуулийн заалтыг мөрдүүлж өөрсдийн яам, харьяа агентлаг, байгууллагуудад шүүхээр ял шийтгүүлж байсан төрийн албан хаагч байгаа тохиолдолд ажлаас халах арга хэмжээг авах.

Мөн Төрийн албанд хуульд зааснаас удаан хугацаагаар түр орлон гүйцэтгэгчээр ажиллаж байгаа албан хаагчдыг ажлаас чөлөөлөх хүртэл арга хэмжээг авахыг энэ удаагийн хуралд оролцсон нийт 12 яамдын ТЗУГ-ын дарга нарт үүрэг болголоо.