Монгол Улс ОУВС-гийн “Өргөтгөсөн санхүүжилтийн хөтөлбөр”-т орсон, оруулсан эсэх тухай яриа улс төрийн цэц булаацалдах талбар болсоор удав. Эдийн засгийн хямралаас үүдэж, Монголоос хөрөнгө оруулагчид үргэсэн үү, үргэсэн. Валютын урсгал тэг зааж, тэр хэрээрээ ам.долларын ханш хөөрөгдсөн үү, хөөрөгдсөн. Ядаж л Төрийн ордонд хөл гишгэх зайгүй болтлоо чуулдаг байсан “Монголын эдийн засгийн форум” тулга тойрсон хэдхэн хүний хүрээнд суугаад газрын хэвлий дэх баялгаа хэрхэх тухай хуралдаж байсан цаг бидэнд бий. Дөрөвхөн жилийн өмнө болсон уг арга хэмжээ эцэстээ оймс шидсэн хэргээр хөшгөө хааж байлаа шүү дээ.

Тэр үетэй харьцуулахад өнөөдөр эдийн засаг харьцангуй сэргэж эхэлсэн. Үүнийг эрх баригчид өөрсдөө онцолж, тодотгоод байгаа юм биш л дээ. Харин олон улсын банк, санхүүгийн байгууллагаас Монгол Улсад хийсэн үнэлгээний үр дүн, тоон мэдээлэл нь хэлэх болов.

Гэтэл Ерөнхийлөгчийн Тамгын газрын дарга З.Энхболд ойрмогхоноос байр сууриа илэрхийлэх бүртээ Засгийн газар, Сангийн сайд руу ноцдог боллоо. Ноцох сэдвийн агуулга нь ОУВС, бай нь сайд Ч.Хүрэлбаатар.

Тэрбээр “Тэтгэврийн зээлийг тэглэсэн нь зөв. ОУВС-тай гэрээ хийсэн Ч.Хүрэлбаатар хариуцдаг юм байгаа биз. Ерөнхийлөгч гэрээ хийгээгүй шүү дээ. МАН-ыхан гэрээ хийсэн. Гэрээ хийх шаардлагагүй байсан. ОУВС-гийн үгэнд орж гэрээ хийгээд есөн татвар нэмээ биз дээ. Өөрсдийнх нь асуудал, ҮАБЗ-д хамаагүй.

ОУВС-гийн үгээр яваад сайхан болдог бол болохоор боллоо, болохгүй байгаа биз дээ. Амьдралгүй шийдвэр гаргадаг. 2012-2016 оны хооронд УИХ, Засгийн газар ОУВС-гаас мөнгө аваагүй шүү дээ.

Авахаар ийм балай, балай шаардлагаа тавьдаг. Тиймээс нээлттэй зах зээлд Самурай, Чингис бондоор зээл авсан. Угаасаа түүхий эдийн үнэ өссөн үед ОУВС уруу ордог нь буруу. Ч.Хүрэлбаатарын буруу. Бурууг нь МАН сонгуулийн үр дүнгээр төлнө. Юм болгон төлбөртэй” гэжээ.

Тамгын газрын дарга З.Энхболдын хэлсэн үгийг дотооддоо хүлээж авах нь нэг хэрэг. Угаас Сангийн сайд Ч.Хүрэлбаатараас “харшил”-тай гэдгээр нь хүлээн авч болох. Харин гадаад тавцанд ямар харагдаж, хүлээж авсан гэдэг нь сонин бөгөөд жигтэй.

Төрийн тэргүүний байр суурийг төлөөлөх хэмжээний албан тушаалыг хашиж яваа эрхэм ОУВС-тай гэрээ хийсэн Ч.Хүрэлбаатар хариуцдаг юм байгаа биз. Өөрсдийнх нь асуудал, ҮАБЗ-д хамаагүй” хэмээн ярьсан нь зүйд хэрхэн нийцэх юм бол.

Үнэндээ З.Энхболдын эдгээр үгийг хувь хүн, улстөрчийнх нь байр суурь хэмээн харж болох ч бүхэл бүтэн Үндэсний аюулгүй байдлын зөвлөлд тусгаар улсын төсөв санхүүтэй холбоотой асуудал тэдэнд хамаагүй гэснийг юу гэж ойлгох вэ?. Гэрээ бол гэрээ. Ялангуяа, олон улсынх. Тэр тусмаа мөнгө санхүүтэй холбоотой гэрээ. Түүнд юу гэж заасан түүгээрээ л явах учиртай биш гэж үү?. Тэгж байж дараа дараагийн хөрөнгө оруулалтыг татах боломж нь бидэнд нээгдэх учиртай. 

Гэтэл эдийн засгийн чадамжаасаа давсан бэлэн мөнгөний амлалт, хий хоосон популизмыг биелүүлэхийн тулд олон улсын өмнө хүлээсэн гэрээгээ зөрчсөн ч хамаагүй байдлаар ханддаг болсны тод жишээ нь З.Энхболд даргаар илрэв үү?.

Эс бөгөөс Үндсэн хуульд заасан хууль тогтоох, гүйцэтгэх, шүүх гэсэн засаглалын гурван салаа мөчрөөс давсан эрх мэдлийг хэрэгжүүлэгч нь Ерөнхийлөгчийн даргалдаг ҮАБЗ болсныг З.Энхболд дарга битүүхэндээ хэлчихэв үү?.

Хуульд зааснаар Ерөнхийлөгчийн Тамгын газрын даргын сэнтий улс төрийн албан тушаалд тооцогддог. Ерөнхийлөгчийн эрх ашгийн хүрээнд томилсноор энэ албанд хэнбугай ч очиж болдог. Тэглээ гээд таалагддаггүй, сонирхлын зөрчилтэй бусад сайд, гишүүдийг чичилж, үгүйсгэхийн нэр биш баймаар. Тэр бүх байр суурийнх нь ард Төрийн тэргүүний бодлого, байр суурь цухалзаж байдаг болохоор. Энэ байдлаараа эцэст нь З.Энхбол даргад Монгол хамааралгүй болох вий?

Г.Эрхэс