Энэ сарын нэгдүгээр сарын 12-ны өдөр Хан-Уул дүүргийн нутаг дэвсгэр “Viva city” хороолол орчимд байрлах нэр бүхий зочид буудалд хар тамхины төрлийн бодис хэрэглэж, мансуурсан нэр бүхий дөрвөн этгээдийг ЦЕГ-ын Хар тамхитай тэмцэх газраас баривчилсан билээ.

Хэргийн газраас баригдсан этгээдүүдийн дунд Эрүүл мэндийн дэд сайдаар ажиллаж байсан Т.Болдбаатарын охин Б  байсан бөгөөд тэрбээр өмнө нь хар тамхи, сэтгэц нөлөөт бодис хэрэглэсэн гэх үндэслэлээр цагдаагийн байгууллагад шалгагдаж байсан талаар бид өмнө нь мэдээллэсэн. Хэдийгээр гүйцэтгэх ажлын хүрээнд эдгээр иргэдийг саатуулсан ч энэ сарын 14-нд буюу өнөөдөр сэжигтэн Б-г батлан даалтаар сулласан байна.   

Тэгвэл эх сурвалжийн мэдээллээр хэргийн газарт Монголын гурав, хятадын нэг иргэн байсан аж. Тэдгээрийн нэг нь өмнө нь 2002 оны Эрүүгийн хуулийн хүний амь бие, эрүүл мэндийн эсрэг заалтаар гэмт хэрэгт буруутгагдаж тэнсэн харгалзах ялаар шийтгүүлж байсан юм байна.

Хэргийг нэхэн сануулбал, Цагдаагийн Ерөнхий газрын Хар тамхитай тэмцэх газраас явуулсан гүйцэтгэх ажиллагааны үеэр метамфетамин буюу ”мөс” болон бусад эд мөрийн баримтыг хураан авсан юм. Улмаар дээрх этгээдүүдээс биологийн шинжилгээ авахад мансуурсан болох нь тогтоогдсон байдаг.

Тэгвэл Эрүүл мэндийн сайд асан Т.Болдбаатарын охины хувьд өмнө нь 2015 онд хар тамхи, сэтгэцэд нөлөөт эм бэлдмэл хэрэглэсэн хэргээр шалгагдаж байсан удаатай. Тодруулбал, 2015 оны аравдугаар сарын 9-нөөс 10-нд шилжих шөнө Хар тамхитай тэмцэх хэлтсийнхэн хар тамхи, мансууруулах, сэтгэцэд нөлөөт бодис бүлэглэн, зохион байгуулалттайгаар худалдан борлуулдаг нэр бүхий есөн хүнийг Сүхбаатар, Чингэлтэй, Баянгол зэрэг дүүргийн нутаг дэвсгэрээс баривчилж, Эрүүгийн хуулийн тусгай ангийн 192,2, 192,3,4, болон 192,3,5-д заасан зүйл ангиар эрүүгийн хэрэг үүсгэн шалгаж эхэлсэн юм.

Баривчлагдсан хүмүүсийн дунд 20-22 насны дөрвөн эмэгтэй байсан бөгөөд тэд бүгдээрээ сэтгэцэд нөлөөт мөс, гашиш төрлийн бодис хэрэглэсэн нь тестээр тогтоогдсон юм. Тэдний зарим нь 2-3 төрлийн бодис хэрэглэсэн нь тогтоогдсон бөгөөд тэдний өмнө нь долоон удаа хулгайн хэргээр ял шийтгэгдэж байсан болон цагдаагийн байгууллагад шалгагдаж байхдаа дахин хэрэг үйлдэж баригдсан нэг хүн байсан аж.

Мөрдөн байцаалтын явцад уг бүлэглэлийн толгойлогч Г гэгч нь олон жил хар тамхи, сэтгэцэд нөлөөлөх бодисыг хууль бусаар худалдан борлуулж, оруулж ирдэг байсан нь тухайн үедээ тогтоогдсон юм. Улмаар түүний зохион байгуулалт дор Г, М, С, А, Н нарын таван хүн хууль бусаар хар тамхи худалдан борлуулж байсан нь хуулийн байгууллагын шалгалтаар тогтоогдсон учир хэргийг шүүхэд шилжүүлэн шийдүүлсэн юм.

Тэдгээрийн дунд Эрүүл мэндийн дэд сайд асан Т.Болдбаатарын 21 настай охин Б байсан юм.

Г.Нацаг