"Макс" группийн Ерөнхийлөгч Д.Ганбаатар өөрийн цахим хуудсаар дамжуулан эмнэлгийн ор хүрэлцэхгүй коридорт хэвтэж байгаа хүүхдүүдэд туслах хүсэлтэй байгаагаа илэрхийлжээ. Тэрбээр “Хөгшид, хүүхдээ тэвэрсэн ээж эмнэлгийн коридорт хэвтэхийг харахаар сэтгэл зовниж байна. Хүрэлцэхгүй байгаа эмнэлгийн орны асуудлыг шийдэж, хувь нэмрээ оруулахад манай хамт олон бэлэн байна. 45 хоногийн дотор эмнэлгийн зориулалттай 500 ор бэлэн болгох боломж бидэнд бий. Мэдээж үйл ажиллагаа, халаалт, дулааны асуудал гээд тодорхой хэмжээнд яригдах байх. Ханиад томууны дэгдэлт дөрөвдүгээр сар хүртэл үргэлжилнэ. Хэвтэн эмчлүүлж байгаа хүүхдүүдийн 80 хувь нь томуу, томуу төст өвнөөс болж эмнэлэгт хэвтэж байна. Дараа жил дахиад л энэ асуудал яригдах нь ойлгомжтой. Санаачлагыг маань Эрүүл мэндийн салбарынхан анхааралдаа авна биз ээ” хэмээсэн юм.

     Энэ талаар "Макс" группээс тодруулахад “Манай байгууллагад эмнэлгийн зориулалтаар ашиглах боломжтой хэд хэдэн барилга бий. Тэдгээрийг ашиглуулах бодол бий. Бид төрд ашиглууллаа гээд заавал одоо төлбөр төл гэж шаардахгүй.

Эхний ээлжинд эмнэлгийн тусламж хэрэгтэй байгаа хүүхдүүдэд туслая.

Үүний дараа төлбөр мөнгөний асуудлаа ярих боломжтой. Гэхдээ зах зээлийн ханшаар биш зөвхөн үйл ажиллагааны төлбөрийг төлөх асуудал яригдаж болно гэдгийг хэллээ.

Тус группийн хувьд хүмүүнлэгийн ажлыг үе шаттай тогтмол зохион байгуулдагаараа бизнесийн салбартаа үлгэр жишээ болсон.

Энэ ч утгаараа төр, хувийн хэвшлийн түшлэлээр дамжуулан нийгэмд нэн тэргүүнд тулгамдаад буй асуудлыг шийдэхэд гар бие оролцохыг хүсэмжилж буй бололтой. 

Томуу, төст өвчний дэгдэлт ойрын үед эрчимжиж, ерөнхий боловсролын сургуулийн сурагчдын амралтыг долоо хоногоор сунгах шийдвэрийг Засгийн газраас гаргаад буй. Хэдийгээр сурагчдын амралтыг ийн сунгаж, өвчний тархалтыг барих бодлого хэрэгжүүлж байгаа ч дүүргүүдийн эмнэлгийн ачаалал их байгаа юм. 

     Яг ийм цаг үед тус группээс дээрх санаачилгыг гаргасан нь нүдээ олсон явдал боллоо. Гэхдээ эл асуудлыг Эрүүл мэндийн сайд дангаараа шийдэх эрх байхгүй. Тиймээс Ерөнхий сайд У.Хүрэлсүхийн таалалд нийцвэл эмнэлгийн тусламж хүссэн хүүхдүүд эмнэлгийн стандарт хангасан орчинд эмчлүүлэх боломж тун ойрхон болох бололтой. 

Г.Маргад