Энэ сарын нэгдүгээр сарын 12-ны өдөр Хан-Уул дүүргийн нутаг дэвсгэр “Viva city” хороолол орчимд байрлах нэр бүхий зочид буудалд хар тамхины төрлийн бодис хэрэглэж, мансуурсан нэр бүхий дөрвөн этгээдийг ЦЕГ-ын Хар тамхитай тэмцэх газраас баривчилсан билээ.

Тодруулбал, Эрүүл мэндийн дэд сайд асан Т.Болдбаатарын охин Б.Буянжаргал болон У.Анхбаяр, БНХАУ-ын иргэн Narengaowa, Лай Фу Жун нарыг хар тамхины хэргээр саатуулж, яллагдагчаар татан шалгаж эхэлсэн бөгөөд тэдэнд холбогдох хэргийг прокурорт шилжүүлсэн юм.

Үүний дагуу нийслэлийн Прокурорын газраас дээрх яллагдагч нарт Эрүүгийн хуулийн тусгай ангийн 20.7 дугаар зүйлийн 2 дахь хэсэг зааснаар эрүүгийн хэрэг үүсгэж цагдан хорих тухай саналаа Баянгол дүүргийн Эрүүгийн хэргийн анхан шатны шүүхэд хүргүүлжээ. Энэ сарын 14-ний өдөр хүргүүлсэн саналыг шүүх хэлэлцээд тус бүр 30 хоног цагдан хорих шийдвэр гаргасан байна. 

Эрүүгийн хуулийн тусгай ангийн 20.7 дугаар зүйлийн 2 дахь хэсэгт Мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгоор хууль бусаар олж авсан, бэлтгэсэн, боловсруулсан, хадгалсан, тээвэрлэсэн, илгээсэн, худалдсан бол хоёр жилээс найман жил хүртэл хугацаагаар хорих ял шийтгэнэ гэж заажээ.