Барилга, хот байгуулалтын сайд асан З.Баянсэлэнгэ болон Ж.Бурмаа, М.Болортуяа нарт холбогдох хэргийн шүүх хурал энэ сарын 22-ны өдрийн 09.00 цагт товлогдсон байна. 

Сайд асан З.Баянсэлэнгэд холбогдох шүүх өмнө нь хэд хэдэн удаа товлогдож байсан тэрбээр шүүгчээс, шүүхээс, өмгөөлөгчөөс татгалзах зэргээр шүүх хуралдааныг удаа дараа хойшлуулж ирсэн юм. 

Хэргийг нэхэн сануулбал, тэрбээр Барилга, хот байгуулалтын сайдаар ажиллаж байхдаа албан тушаалын байдлаа урвуулан ашиглаж "Бэрэн групп" ХХК-ийн барьсан "Хангай" хотхоны орон сууцнаас 123 айлын орон сууцыг тендер зарлалгүйгээр худалдан авч улсын төсөвт 972.4 сая төгрөгийн хохирол учруулсан байж болзошгүй гэх хэргээр шалгаж байгаа юм. З.Баянсэлэнгэтэй хамт БХБЯ-ны мэргэжилтэн асан М, Болортуяа, Төрийн банкны ерөнхий захирал Д.Баярсайхан, гүйцэтгэх захирлаар ажиллаж байсан Б.Цэндсүрэн, өнөөгийн удирдлагын багт нь багтдаг, тэргүүн дэд захирал Д.Ганбаатар, “Шинжаан шинфан” ХХК-д эрх бүхий албан тушаал хашдаг Сун Гуан Чин нарын хүний гэм буруутай, эсэхийг хэлэлцэх аж.

Уг хэрэгт 2002 оны Эрүүгийн хуулийн ерөнхий ангийн 263 дугаар зүйлийн 2 дахь хэсэг Төрийн албан тушаалтан албаны эрх мэдэл буюу албан тушаалын байдлаа урвуулах, Эрүүгийн хуулийн тусгай ангийн 22.5 дугаар зүйлийн 3 дахь хэсэгт зааснаар Хахуул өгөх гэмт хэрэгт холбогдуулан яллах дүгнэлт үйлдэн шүүхэд шилжүүлсэн юм.