Улсын Дээд шүүх 2019 онд эрүү, иргэн, захиргааны нийт 3015 хэрэг хүлээн авч, шүүх хуралдаанаар 2114 хэрэг хянан шийдвэрлэжээ. Хянан шийдвэрлэсэн хэргийн 20.6 хувь нь  захиргааны, 31.9 хувь нь эрүүгийн, 47.5 хувь нь иргэний хэрэг байна.

Тодруулбал, Эрүүгийн хэргийн танхим нийт 971 хэрэг хүлээн авч, эрүүгийн 665, цагаатгалын 9 буюу нийт 674 хэргийг шүүх хуралдаанаар хянан шийдвэрлэж, 130 хэргийг шүүгчийн захирамжаар буцааж, 129 хэргийг Ерөнхий шүүгчийн ажлын албанд шилжүүлжээ.

Эрүүгийн хэргийн танхимын хяналтын шатны шүүх хуралдаан нийт 63 өдөр хуралдаж, өдөрт дунджаар 11 хэрэг хэлэлцсэн байна. Эрүүгийн хэргийн танхимд хяналтын шатны журмаар ирүүлсэн хэргээс нэг шүүгчид 210 хэрэг ногдож байна.

Хяналтын шатны шүүх хуралдаанаар хянан шийдвэрлэгдсэн 674 хэргийн 42.4 хувь буюу 286 хэргийн тогтоол, магадлалыг хэвээр үлдээж, гомдол, эсэргүүцлийг хэрэгсэхгүй болгож, 32.2 хувь буюу 217 хэргийн тогтоол, магадлалд өөрчлөлт оруулж, 25.4 хувь буюу 171 хэргийн тогтоол, магадлалыг хүчингүй болгожээ.

Хүчингүй болгосон 171 хэргийн 41 хувь буюу 70 хэргийн шийтгэх тогтоолыг хэвээр үлдээж, магадлалыг хүчингүй болгож,  34 хувь буюу 58 хэргийг шүүхээр дахин хэлэлцүүлэхээр буцааж, 12.8 хувь буюу 22 хэргийг нэмэлт хэрэг бүртгэлт, мөрдөн байцаалт хийлгэхээр прокурорт буцааж, 12.2 хувь буюу 21 хэргийг хэрэгсэхгүй болгож (үүнээс 4.6 хувь буюу 8 нь цагаатгалын хэрэг) шийдвэрлэжээ.

Хяналтын шатны эрүүгийн хэргийн шүүх хуралдаанаар шийдвэрлэсэн хэргийн 57 хувь буюу 384 хэргийг өмгөөлөгчийн гомдлоор, 14.7 хувь буюу 99 хэргийг ялтны гомдлоор, 11.4 хувь буюу 77 хэргийг улсын яллагчийн эсэргүүцлээр, 7.8 хувь буюу 53 хэргийг прокурор (цагаатгал 9)-ын дүгнэлтээр, 5.5 хувь буюу 37 хэргийг хохирогчийн гомдлоор, 2.8 хувь буюу 19 хэргийг хууль ёсны төлөөлөгчийн гомдлоор, 0.5 хувь буюу 3 хэргийг иргэний хариуцагчийн гомдлоор, 0.3 хувь буюу 2 хэргийг цагаатгагдсан этгээдийн гомдлоор хэлэлцсэн байна.

Хяналтын шатны эрүүгийн хэргийн шүүх хуралдаанаар шийдвэрлэсэн 674 хэргийг гэмт хэргийн төрлөөр авч үзвэл хүний эрүүл мэндэд хөнгөн хохирол учруулах гэмт хэрэг 100, хулгайлах гэмт хэрэг 90, хүчиндэх гэмт хэрэг 73, хүнийг алах гэмт хэрэг 70, залилах гэмт хэрэг 62, автотээврийн хэрэгслийн хөдөлгөөний аюулгүй байдал, ашиглалтын журам зөрчих гэмт хэрэг 58, хүний эрүүл мэндэд хүнд хохирол санаатай учруулах гэмт хэрэг 44, мансууруулах эм, сэтгэцэд нөлөөт бодисыг хууль бусаар ашиглах гэмт хэрэг 21, дээрэмдэх гэмт хэрэг 18, хүний эрүүл мэндэд хүндэвтэр хохирол санаатай учруулах гэмт хэрэг 16, хөрөнгө завших гэмт хэрэг 13,  мал хулгайлах гэмт хэрэг 11,  хахууль авах гэмт хэрэг 6, хүний эрүүл мэндэд хүнд хохирол болгоомжгүйгээр учруулах гэмт хэрэг 4, улсын хилээр барааг хууль бусаар нэвтрүүлэх гэмт хэрэг 4, хахууль өгөх гэмт хэрэг 3,  хүний эрүүл мэндэд хүндэвтэр хохирол болгоомжгүйгээр учруулах гэмт хэрэг 3,  гэр бүлийн хүчирхийлэл үйлдэх гэмт хэрэг 2,  хүн худалдаалах гэмт хэрэг 1,  бусад төрлийн гэмт хэрэг 75 байгаа аж.

Улсын Дээд шүүхийн хяналтын шатны Эрүүгийн хэргийн шүүгчдийн нэгдсэн хуралдаанаар хянан шийдвэрлэгдсэн 23 хэргийн 65.3 хувь буюу 15 хэргийн хяналтын шатны шүүх хуралдааны тогтоол, шүүгчийн захирамжийг хэвээр үлдээж, гомдлыг хэрэгсэхгүй болгож, 13 хувь буюу 3 хэргийн хяналтын шатны шүүх хуралдааны тогтоолд өөрчлөлт оруулж, 21.7 хувь буюу 5 хэргийн хяналтын шатны шүүх хуралдааны тогтоол, шүүгчийн захирамжийг хүчингүй болгосон байна.

Улсын Дээд шүүхийн хяналтын шатны Эрүүгийн хэргийн шүүгчдийн нэгдсэн хуралдаанаар шийдвэрлэсэн хэргийн 13 хувь буюу 3 хэргийг Улсын Дээд шүүхийн Ерөнхий шүүгчийн дүгнэлтээр, 13 хувь буюу 3 хэргийг хоёр шүүгчийн тусгай санал гаргасан үндэслэлээр, 8.7 хувь буюу 2 хэргийг Улсын ерөнхий прокурорын эсэргүүцлээр, 4.4 хувь буюу 1 хэргийг прокурорын дүгнэлтээр, 60.9 хувь буюу 14 хэргийг ялтан, хохирогчийн өмгөөлөгчийн гомдлоор хэлэлцжээ.

Өмнөх онтой харьцуулахад хүлээн авсан эрүүгийн хэрэг 110-аар буюу 12.8 хувиар, хяналтын шатны шүүх хуралдаанаар шийдвэрлэсэн хэрэг  101-ээр буюу 17.6 хувиар өсчээ.