Иргэн Г.Баасан. Хатагтай Г.Баасан. Ахмадуудын холбооны тэргүүн Г.Баасан. Авлигатай тэмцэх газрын дэргэдэх Олон нийтийн зөвлөлийн дарга Г.Баасан. Тэмцэгч Г.Баасан. Энэ мэтчилэн түүнд олон тодотгол бий. Монголын ахмадын чөлөөт холбоог тэргүүлж, өөрөө хийгээд өрөөлийн өндөр настнуудыг төв талбайд цуглуулан түмпэн, шанага агсан жагсаж, Төрийн ордонд суугаа түшээдийг чичилж явсан үе нь ч мөн бий.

Сүхбаатар дүүргийн шүүхийн зарлан дуудах шийдвэрийг биелүүлээгүй гэсэн үндэслэлээр албадан баривчлуулж, Дэнжийн мянгын урьдчилан хорих байрт 10 хоног саатуулагдсан түүх ч түүний намтрын нэгээхэн хэсэг.

Ямарч байсан хүний эрх, хуулийн хэрэгжилт, тэр дундаа ахмадуудын төлөө тэмцэж, өвлийн тэсгим хүйтэн өдрүүдэд төрийн цагдаатай нударга зөрүүлэх нь холгүй сөргөөцөлдөж явснаараа нийгэмд тэр дүрээ тодоор үлдээсэн төрх нь энэ.

Өдгөө тэрбээр ахмадуудын эрх ашгийн төлөөх ажлаа орхиод Авлигатай тэмцэх газрын дэргэдэх Олон нийтийн зөвлөлийн даргын албыг хашиж байна. Сонирхолтой нь, 2017 оны наймдугаар сарын 29-нд Ерөнхийлөгч Х.Баттулгын захирамжаар АТГ-ын дэргэдэх олон нийтийн зөвлөлийн гишүүнээр томилогдож бүр даргаар нь сонгогдсон Г.Баасан хашиж байгаа албан тушаалынхаа эрх үүргийг хараахан ойлгоогүй явсаар ирэх сонгуульд АН-аас нэр дэвших эхний алхмаа хийлээ. Хийлээ гэдэг нь тэрбээр АН-ын Үндэсний бодлогын хорооны гишүүний дотоод сонгуульд Хэнтий аймагт өрсөлдөхөөр бүртгүүлжээ.

АН-ын тогтоолд зааснаар дотоод сонгуулийг энэ сарын 26-ны 10.00 цагт эхлүүлж, тухайн өдрийнхөө 19.00 цагт дуусгавар болгохоор заажээ. Үүгээр Үндэсний бодлогын хорооны гишүүний нөхөн сонгуулийг есөн аймаг, хоёр дүүрэгт явуулж 21 хүнийг сонгохоор төлөвлөжээ. Тэдгээрийн нэг нь Г.Баасан.

Дотоод сонгуульд нэр дэвшихээр бүртгүүлэх татварын хэмжээ, намдаа, төдийгүй нийгэмд өөрийн гэсэн орон зайтай болсон хүний хувьд Г.Баасан хатагтайн гаргасан шийдвэр өөрт илүү дөхөм байсан тодорхой.

Нөхөн сонгуулийн үр дүнгээр ҮБХ-ны гишүүн болох магадлал нь өндөр. Бараг сонгогдож таарна. Харин тэр үед УИХ-ын сонгуульд АН-аас нэр дэвших эрхтэй болсон Г.Баасанд С.Эрдэнэ дарга хаана, аль тойрогт мандат олгох вэ гэдэг нь сонирхолтой. Өмнөх сонгуулиар Ерөнхийлөгч Х.Баттулгад шадарласных нь шагналд түүнийг АТГ-ын дэргэдэх Олон нийтийн зөвлөлд зүтгүүлж, даргаар нь томилуулсан байдаг. Бүр тус газрын дарга асан Х.Энхжаргалын оронд даргаар нь томилуулах сэдлийг нийгэмд их, бага хэмжээгээр өгсөн ч тэр бүтээгүй.

Ямар ч байсан Г.Баасан хатагтай Олон нийтийн зөвлөлд очсоныхоо зорилгыг гаргасан. Мэдээлэлд ойр байдлаа ашиглан бусдын эрх ашгийг хөндсөн зарим хэрэгтэй холбоотой асуудлыг ямар нэгэн цензургүйгээр олон нийтэд түгээж, улс төрийн зорилгоор ашиглах болсон нь нууц биш, хүн бүрийн өмнө ил болсон асуудал. 

Гагцхүү Ерөнхийлөгч Х.Баттулгын "цензургүй цагаан хоолой" гэсэн тодотголыг зүүх болтлоо шадарласан Г.Баасанг Хэнтий аймгийн АН-ын дотоод сонгуульд өрсөлдүүлэх эрхээ С.Эрдэнэ даргаас ийнхүү авлаа. Түүний дараагийн зогсоол УИХ-ын ээлжит сонгууль гэдэг нь хэн бүхэнд тодорхой ч, хаанаас нэр дэвшиж, хэнтэй өрсөлдүүлэх нь С.Эрдэнэ дарга эрх мэдлийнхээ хүрээнд шийдэх асуудал юм.

Г.Эрхэс