УИХ-ын ээлжит сонгуульд нэр дэвших улстөрчдийн сунгаа албан ёсоор эхлээгүй байгаа ч энэ парламентад хамгийн “асуудал”-тай яваа гишүүний нэгээр дарван аварга Б.Бат-Эрдэнэ тодорч байх шиг. Асуудал гэхээсээ түүний зовлон дуусахгүй нь, эрхэлж байгаа албан тушаалынх нь хүрээнд. Нэгдүгээрт, тэрбээр Монголын Үндэсний бөхийн холбооны тэргүүнээр ажилладаг. Хоёрдугаарт, гишүүн Б.Бат-Эрдэнэ УИХ-ын Ёсзүйн дэд хорооны даргаар ажиллах болоод багагүй хугацаа өнгөрч байна. Сонирхолтой нь, түүний эрхэлж байгаа албан тушаалын хүрээнд нийгэм, улс төрийн хүрээнд эргэлзээ, шүүмжлэл, хүлээлт үүсгэж эхэллээ. Аль аль нь анхаарал хандуулах сэдэв болохоор тэр.

Эхнийх нь идэр залуухан шавь нь улсын наадмын түрүү авснаар Хэнтийчүүд хоёр дахь аваргаа өлгийдөн авсан нь өнгөрсөн жилийн үйл явдал. Гэвч түрүү бөхийн шинжилгээнээс хоритой эмийн дөрвөн ч төрлийн бодис илэрсэн нь отгон аварга Э.Оюунболдыг зүлэг ногоон дэвжээнээ гарахад хязгаар тавьсаар өнөөг хүрэв.

Бөхийн болон Үндсэн баяр наадмыг зохион байгуулах хорооноос хориотой эм хэрэглэсэн нэр бүхий бөхчүүдийн барилдах эрхийг нь хасч, цолыг нь хураалгахаар Ерөнхийлөгчид хандсан ч хууль хяналтын байгууллагын шийдвэр хараахан гараагүй байгаа тухай Тамгын газрын дарга З.Энхболд мэдэгдсэн.

Дархан аварга Х.Баянмөнх нартай жил дамнан зөрчилдсөн тэдний маргаан эцэстээ “Гацуурт”-ын Л.Чинбат Б.Бат-Эрдэнэд холбооны тамга, тэмдгээ гардуулах замаар “тахим”-аа өгснөөр нэг тийш болсон ч шавийнх нь нэр холбогдсон асуудлаар Бөхийн холбоо ямар шийдэлд хүрэх нь өнөөдөртөө эргэлзээтэй байгаа юм. Өөрөөр хэлбэл, допинг хэрэглэсэн гэх асуудлыг нь эцэслэн мухарлаагүй байхад аварга Э.Оюунболд Сар шинийн барилдаанд зодоглосон тохиолдолд Э.Оюунболдоос гадна түүнийг барилдуулсан Бөхийн холбоо ч муухай харагдана. Ёс зүй талаасаа ч Э.Оюунболд аваргыг шүүмжлэх хүн олон гарах болов уу.

Удаах нь гэвэл УИХ-ын дарга Г.Занданшатарын Австралид хийсэн албан томилолтын үеэр казино тоглосон гишүүдтэй холбоотой үнэн, мөнийг тогтоох эсэх асуудал гишүүн Б.Бат-Эрдэнийн даргалдаг Ёс зүйн дэд хороогоор орох учиртай.

Тус хорооноос холбогдох баримт, дүгнэлт, мэдээллийн хүрээнд гаргасан дүгнэлтийг УИХ хэлэлцэж эцсийн шийдвэрийг гаргана гэсэн үг.

Өөрөөр хэлбэл, хэн хэн нь Казиногийн хуулийн төслийг УИХ-д өргөн барьж, ажлын хэсэг байгуулсантай холбогдуулж, гаднын орны туршлага судалсан гэх гишүүдийн тайлбар үнэн эсэхийг дэнслэх эхний шат нь Ёс зүйн дэд хороо. Эндээс харахад дархан аварга Б.Бат-Эрдэнийн зовлон хэсэгтээ л дуусахгүй бололтой.

Г.Эрхэс