УИХ-ын Өргөдлийн байнгын хорооны өнөөдрийн хуралдаанаар Шударга өрсөлдөөн, хэрэглэгчийн төлөө газрын тайлан, мэдээллийг сонслоо. Энэ үеэр УИХ-ын гишүүн Л.Энхболд "Өмнөговь аймгийн Хүрмэн сумын нутаг, Цагаан дэл уулын орчим хилийн боомт нээх асуудлыг нутгийн иргэдээс санал авалгүй шийдвэрлэсэн. Ховор ан амьтантай, ундны усгүй шахам, онгон дагшин газар хилийн боомт нээж, суурин газар болгох нь зохисгүй гэдгийг иргэд хэлж байна" хэмээгээд эл асуудлыг Өргөдлийн байнгын хороогоор хэлэлцэн, шийдвэрлэх хүсэлт гаргасан юм.
УИХ-ын гишүүн, Өргөдлийн байнгын хорооны дарга М.Оюунчимэг энэ асуудлаар иргэдээс ирсэн өргөдлийн дагуу Засгийн газрын Хэрэг эрхлэх газарт болон бусад холбогдох байгууллагуудаас мэдээлэл авахаар албан бичгээр хандсан бөгөөд албан мэдээлэл авсны дараа хэлэлцэх боломжтойг хэллээ.
Шударга өрсөлдөөн, хэрэглэгчийн төлөө газар иргэн, аж ахуйн нэгжээс ирүүлсэн өргөдөл, гомдлыг шийдвэрлэхэд тулгамдаж буй асуудлыг танилцууллаа. Тухайлбал, үйл ажиллагаа хэвийн явуулах нөхцлийг хангах хэмжээнд орон тоог нэмэгдүүлэх, орон нутгийн орон тооны бус улсын байцаагчдийг орон тооны болгож, ажиллах нөхцөл боломжийг бүрдүүлэх, байгууллагын хэвийн үйл ажиллагаанд шаардагдах үндсэн хөрөнгийн шинэчлэлд зориулагдсан компьютер, тоног төхөөрөмж, хяналт шалгалтын автомашин авахад шаардагдах хөрөнгө оруулалтын зардлуудыг шийдвэрлэх, хэрэглэгчийн өргөдөл, гомдлыг шийдвэрлэхэд төрийн байгууллагуудын уялдаа холбоо, хамтын ажиллагааг хангах, газрын хараат бус бие даасан байдлыг хангах эрх зүйн орчныг шинэчлэх, төсөв дутмагаас өрсөлдөөн, хэрэглэгчийн эрхийг хамгаалах чиглэлийн олон нийтийг соён гэгээрүүүлэх, урьдчилан сэргийлэх арга хэмжээг дотоод нөөц, боломжийг бүрэн дайчилж, гадаадын төсөл, хөтөлбөрийн дэмжлэгтэйгээр хэрэгжүүлж байгаа боловч шаардлагатай хэмжээнд хүрэхгүй байгаа зэрэг асуудлыг яаралтай шийдвэрлэх шаардлагатайг гэлээ.
Цаашид эрх зүйн орчныг сайжруулах ажлын хүрээнд Өрсөлдөөний тухай хуулийн шинэчилсэн найруулгын төсөл, Хэрэглэгчийн эрхийг хамгаалах тухай хуулийн шинэчилсэн найруулгын төсөл, Зар сурталчилгааны тухай хуулийн төслүүдийг батлах шаардлагатай талаар танилцуулсан юм.
Үүний дараа нь мэдээлэлтэй холбогдуулж УИХ-ын гишүүд асуулт асууж, хариулт авлаа.
УИХ-ын гишүүн Ц.Гарамжав: Хүнсний бүтээгдэхүүний чанар, стандарттай холбогдуулан үндэсний болон импортоор оруулж ирж байгаа хүнсний бүтээгдэхүүний худалдаа, үйлдвэрлэлд шударга өрсөлдөөн хэрхэн хангагдаж байга вэ. Мөн Монголд үйлдвэрлэсэн хүнс ч, бараа бүтээгдэхүүн ч үнэ нь өндөр хэрнээ олон улсад битгий хэл, дотооддоо өрсөлдөх чадваргүй байх хандлага байна. Энэ талаар судалгаа байна уу?
ШӨХТГ-ын дарга Б.Лхагва: Өрсөлдөөний асуудлыг улс оронд зохион байгуулах эрх зүйн орчин байгаа ч бүхий л салбарт хүрч ажиллах хүний нөөцийн боломж, хүчин чадал тааруу. Боломж нөөцөө ашиглан салбарын яам, агентлагуудад зөвлөмж хүргэж ажилладаг.
УИХ-ын гишүүн Д.Сарангэрэл: Дотоодын зах зээл, үндэсний үйлдвэрлэгчдээ хамгаалах, дэмжих талаар явуулж буй бодлого, мах, шатахууны үнийн өсөлтийн дагуу хэрхэн ажилладаг вэ?
ШӨХТГ-ын дарга Б.Лхагва: Махны үнийн өсөлттэй холбогдуулж салбарын яаманд зөвлөмж хүргүүлж ажилладаг. Махны үнийн өсөлтөд мах бэлтгэлийн ажил хангалтгүй байгаа нь нөлөөлдөг дүгнэлт гардаг. Мөн махыг экспортод гаргахдаа цаг хугацааны хувьд дотоодын эрэлт ихэсдэг цаг үетэй тааруулахгүйгээр зохицуулах шаардлага байна.
Хуралдааны төгсгөлд УИХ-ын гишүүн, Өргөдлийн байнгын хорооны дарга М.Оюунчимэг Өргөдлийн байнгын хороо, Шадар сайдын Ажлын албатай хамтарч тулгамдсан асуудлыг шийдвэрлүүлэх талаар ажиллана гээд Байнгын хорооны хуралдааны тэмдэглэлээр Засгийн газарт хугацаатай үүрэг даалгавар өгч байна гэдийг мэдэгдэв.