Орон  нутгийн цаашдын хөгжил, бүтээн байгуулалтын талаар аймаг, нийслэлийн ИТХ-ын дарга, Засаг дарга нар Төрийн ордонд семинар хийж байна. Хурал  хоёр дахь өдрөө үргэлжилж байна.

Энэ үеэр ЗГХЭГ-ын дарга Л.Оюун-Эрдэнэ “Аймгуудаас бүсчилсэн хөгжлийн бодлогын чиглэлээр хэд хэдэн санал ирүүлсэн. Зөвхөн бодлогод биш аймаг бүхэн өөр өөрсдийгөө алсын хараагаар төлөвшүүлэх хэрэгтэй байна. Алсын хараа гэдэг нь тухайн ард түмний хүсэл, оюун санааны давхцал юм. Тухайлбал, Архангай аймагт байгаа бүх хүнтэй ярилцвал тэдний алсын хараа гарах болно. Намуудын мөрийн хөтөлбөр төсөл биш байгаасай гэж хүсч байна. Популизм хийх шаардлагагүй.

Үндэсний нэгдмэл үнэт зүйл гэдэг чухал. Учир нь манай улс хоёр том хөрштэй. Дэлхий нийт даяаршиж байгаа ч өнөөдрийн Монгол Улсыг мэдэхгүй байна. Нүүдэлчин ахуйгаар нь төсөөлдаг төсөөлөлтэй юм байна. Нийгэм эдийн засаг хэрхэн хөгжихийг, дэлхийн бизнесменүүд монголын бизнесменүүдтэй хэрхэн хамтран ажиллахыг бид дэлхийд таниулж өгөөгүй. Энэ бүх зүйлийг том зургаар нь харах цаг болсон.

Хоёрдугаарт, өнгөрсөн хугацаанд мөнгө мөнгө, эдийн засаг гэж байгаад бид хүнээ мартаж. Өргөн уудам газар нутагтай ч мал аж ахуй маань дэлхийд гараагүй. Хүн амын 30 хувь нь ядуу. Ийм л байдалтай байна.

Түүнчлэн төрийн албан хаагчид маань уулзахад нүд нь гялтганасан байя. Түүнээс биш ядсан төрийн албан хаагчидтай уулзмааргүй байна. Та бүхэн ирээдүйд ийм зүйл хийе гэсэн мөрөөдлийг орон нутгийн иргэдэд 51 хувийг нь өгч чадвал аль нам засгийн эрхэнд байсан, хэн ч сайд байсан хэрэгжиж чаддаг юм байна. Үүнийг хоосон газар дээр боссон БНСУ болон Сингапур, Энэтхэг зэрэг улс нотолсон.

Бид хүн ам цөөтэй гэдэг. Үүнийгээ давуу тал болгоё. Ийм олон улсын жишээ байна. Бид бүгдээрээ гар утастай, кофе уудаг. Оюун ухаанаараа дэлхийд тэргүүлдэг. Гагцхүү тогтвортой төлөвшил хэрэгтэй. Манай улс багийн спорт, хөлбөмбөг зэргээр дэлхийд гарч чадахгүй гэж хэдхэн жилийн өмнө ярьж байсан бол 3х3 багийн охид үгүй гэдгийг харуулж чадлаа. Х.Хатанбаатар болон түүний шавь дэлхийд өөрсдийгөө харуулж байна. Хөрвөх чадваргүй үндэстэн бүхэн мөхдөг. Гэтэл Монголчууд хамгийн хөрвөх чадвартай ард түмэн гэж гаднын эрдэмтэн хэлсэн байдаг.

Монгол гэдэг нэг л усан онгоц байна. Бусад улстай хамтдаа өрсөлдье. Үүн дээр Засгийн газартайгаа хамт ажилла. Орон нутгаа хөгжүүлэх хэрэгтэй байна. Тухайлбал, өнгөрсөн хугацаанд бид нийслэлийн утааг 50 хувь бууруулж чадлаа. Нийлээд хийвэл болдог юм байна. Тиймээс хаана юуг хийх вэ гэдгийг сайтар төлөвлөж хийх хэрэгтэй. Бие биенээсээ суралцах хэрэгтэй байна. Ачааныхаа хүндийг үүрч байдаг орон нутгийнхаа дарга нарыг ойлгож байна. Гэхдээ бид өдөржин, шөнөжин ажиллах хэрэгтэй. Байгалийн эрх чөлөөгөө хязгаарлах хэрэгтэй. Энэ нь хариуцлага юм шүү” гэсэн юм.

Б.Лхам