Ерөнхий сайд асан Ч.Сайханбилэгийг Оюу толгой компанийн хөрөнгө оруулалтын Дубайн гэрээг байгуулахдаа Монголын ард түмний эрх ашигт нийцээгүй хэд хэдэн хууль бус шийдвэр гаргасан гэх үндэслэлээр Авлигатай тэмцэх газраас шалгаж байгаа билээ. Түүнийг цагдан хорих 461 дүгээр ангид саатуулсан байдаг. Улмаар хилийн хориг тавьж, батлан даалтад гаргах үеэр тэрбээр эмчлүүлэх хүсэлт тавьсныг хүлээн авсан юм. Гэвч түүнийг эмчлүүлэх нэрийдлээр оргон зайлсан учир эрэн сурвалжилж байгаа талаар мэдээлэх гарах болсон билээ. Үүнийг Ерөнхий сайд асан Ч.Сайханбилэг үгүйсгэж “Улс төрийн зохиомол жүжгийн гол дүр нь болж хэлмэгдэх ёстой бол төрийн хамгаалалт нь хамт явж байгаа. Эхлээд та бүхэн шаардлагын дагуу шалгалтаа хийнэ үү?" хэмээн мэдэгдсэн.

Тэгвэл Ерөнхий сайд асан Ч.Сайханбилэгт АНУ-ын хуулийн фирм болох “Amsterdam&Partners” компани өмгөөллийн туслалцаа үзүүлэхээр гэрээ байгуулжээ.

Энэ талаар тус компанийн үүсгэн байгуулагч, хуульч Роберт Амстердам “Монголын төс засаг шүүхийн хараат бус байдал, хууль дээдлэх зарчимдаа халдаж байна” хэмээгээд мэдэгдэл гаргасан байна. Ерөнхийлөгч Х.Баттулга 2017 онд сонгогдсоноос хойш хэвлэл мэдээллийн байгууллагууд, шүүгч нарт ихээхэн дарамт шахалт нөлөөлөх болсон. Transparency, Amnesty зэрэг олон улсын байгууллагууд Ерөнхийлөгч Х.Баттулгын дураараа аашилж, эрх мэдлээ хэтрүүлэн ашиглаж байгаад ихэд зовниж байгаа.

Ерөнхий сайд асан Ч.Сайханбилэг нь Рио Тинто компанитай гэрээ байгуулахдаа, Монгол Улсын Их Хурлын зөвшөөрлөөр байгуулсан.

Ч.Сайханбилэгийг ийнхүү үндэслэлгүйгээр хавчиж байгаа нь Монголын шүүх тогтолцоо, гадаадын шууд хөрөнгө оруулалтад сөргөөр нөлөөлж байна. Amsterdam & Partners компани Ерөнхий сайд асан Ч.Сайханбилэгийг төлөөлөн тун удахгүй дахин мэдэгдэл хийнэ" гэжээ.

С.Сүлд