УИХ-ын хаврын ээлжит чуулганаар аймаг, сум, нийслэлийн ИТХ-ын сонгууль болон хамт өргөн мэдүүлсэн бусад хуулийн төслийг хэлэлцэж байна. Энэ үеэр гишүүд үг хэлж, асуулт асуулаа.

УИХ-ын гишүүн Д.Эрдэнэбат: Хууль хугацааны хувьд шахуу л яваад байгаа юм. Зарчим нь хуучин хуулиасаа ялгаа байхгүй болсон. Уг нь сонгуулийг хялбар, богино хугацаанд явуулах талаар ярьж байсан. Хугацааг богино болгосноос өөр дэвшилттэй зүйл гараагүй. Намууд нэр дэвшүүлж байгаа ч гэсэн иргэдийн санал дээр горилж нэр дэвшүүлэх нь чухал байсан. Илүү шалгууртай болж, сурталчилгаа нь хялбар болно. М.Энхболд гишүүний хэлсэн үгтэй санал нэг байна. Сумын болон аймгийн ИТХ хурал дээр хамт нэр дэвшээд сонгогдох боломж бий болгох хэрэгтэй. 1996 онд хэрэгжиж байсан хууль. Энэ замыг туулсан хүний хувьд зөв гэж хэлмээр байна. Х.Нямбаатар гишүүнд хэлэхэд төрийн байгууллага сонгогодох талаар ярихад та амны алдаа гаргасан нь үнэн. Зүүнхараагийн хулгайч нар гарчихвал яах юм гэж та хэлсэн биз дээ. Тиймээс залуу хүн байх нь хамаагүй уучлалт гуйх хэрэгтэй.

УИХ-ын гишүүн Х.Нямбаатар: Би тийм зүйл хэлээгүй. Сонгууль дөхөөд ирэхээр ядмагдхан улс төр хийж байх шиг байна. Албан ёсоор хэд хэдэн сумдуудын нэр хэлээл хамаатан садан төрлөөрөө ИТХ-ыг авах сөрөг үр дагавар гарна шүү гэж хэлсэн. Улстөржүүлээд байх юм. Өнөөдөр Улсын бүртгэлд 22 мянган төрийн бус байгууллага байна. Зарим нь мартчихсан явж байгаа.

УИХ-ын дэд дарга Л.Энх-Амгалан: Орон нутгийн сонгуулийн тухай хуулийн зарчим нь ил тод, мөнгөний биш байх л зарчим. Хоёрдугаарт, иргэд өөрсдийн хүссэн хүнээ сонгох. Одоо бол зөвхөн анхны хэлэлцүүлгээ хийж байна. Хэлэлцүүлгийн үеэр шийдэж болох байх. 33.1 дээр унагаад хоёр дахь хэлэлцүүлгээрээ шийдэх нь зөв гэж харагдаж байна.

УИХ-ын гишүүн Х.Баделхан: Төрийн албан хаагчид сонгуульд оролцохоор бол ажлаа өгөхөөр байна. Иргэдийн зүгээс Их Хурлын сонгууль явагдсаны дараа ажлаа өгье гэсэн. хугацааны хувьд ямар байх вэ. Төрийн алба хаагчид бүгд нэр дэвшиж болох уу. Шилжих хөдөлгөөнийн хэрхэн зохицуулсан бэ.

УИХ-ын гишүүн Х.Нямбаатар: Ажлын хэсэгт наймдугаар сарын 1-ээс ажлаа өгч болно гэж санал гаргасан ч дэмжигдээгүй. Төрийн бүх албан хаагч ажил өгөхөөр зохицуулсан учраас заасан хугааны аль нэгэнд нь ажлаа өгөх юм. Мөн шилжилт хөдөлгнөөнийг хоёрдугаар сарын 1-ээс эхлэн улс орон даяар зогсож, сонгуулийн дараа нээнэ. Хэрэв хуулийн төсөл ирэх долоо хоногт батлагдаж чадвал орон нутгийн сонгуулийг аравдугаар сард багтаан дуусна.

Б.Лхам