Чуулганы хуралдаан даргалагч УИХ-ын дэд дарга Л.Энх-Амгалан хуралдаа суугаагүй гишүүдийн нэрсийг зарлаж, хуралдаа суухыг анхаарууллаа.

УИХ-ын өнөөдрийн хуралдаанаар Орон нутгийн сонгуулийн тухай хуулийн төслийн зарчмын зөрүүтэй саналыг хэлэлцэж буй. Гэвч ач холбогдолтой чухал хуулийн төлсийг 75 гишүүнээс 44 гишүүн л хэлэлцэж байна. Өөрөөр хэлбэл, 31 гишүүн ямар нэг байдлаар чуулган тасалж, чуулганы хуралдааныг гацааж байна. 

Энэ ч үүднээс зарим гишүүдийн зүгээс ирцээ бүрдүүлэхийг хуралдаан даргалагчаас шаардаж байсан юм.

Үдээс хойшхи чуулганы хуралдаанд Н.Амарзаяа, Х.Баделхан, С.Батболд, Б.Батзориг, Х.Болорчулуун, Ж.Ганбаатар, Д.Ганболд, Л.Мөнхбаатар, Л.Оюун-Эрдэнэ, Д.Оюунхорол, Ш.Раднаасэд, Б.Санжмятав, Г.Солтан, А.Сүхбат, Н.Цэрэнбат, С.Чинзориг, Л.Элдэв-Очир, Б.Энх-Амгалан, Н.Энхболд, Ө.Энхтүвшин нарын гишүүд суусангүй.

Энэ талаар УИХ-ын гишүүн О.Баасанхүү, Т.Аюурсайхан нарын гишүүд “чухал хуулийн төсөл хэлэлцэж байхад ирц гэх шалдир булдар зүйл яриад сууж байна. Ер нь гишүүд өөрсдөдөө хэрэгтэй асуудал хэлэлцэхээр бүрэн суудаг” хэмээн онцолсон юм. Түүнчлэн ирц бүрдээгүйн улмаас ач холбогдол өндөртэй зарим хуулийн заалт унаж байгааг хэлж байлаа.

Б.Лхам