УИХ-ын гишүүн, УИХ-ын Нийгмийн бодлого, боловсрол шинжлэх ухааны байнгын хорооны дарга Д.Оюунхоролыг яллагдагчаар татжээ.

Түүнийг Засгийн газрын гишүүн, БОНХАЖ-ын сайдаар ажиллаж байхдаа албан тушаал, эрх мэдлээ урвуулан ашиглаж, бусдад давуу байдал бий болгон, улсад их хэмжээний буюу 1.9 тэрбум төгрөгийн хохирол учруулсан хэргээр шалгаж байгаа гэх мэдээлэл цацагдсан. Тодруулбал, Хилийн цэргийн 0151 дүгээр анги руу татсан “Гранд повер” компанийн хийж гүйцэтгэсэн 1.9 тэрбум төгрөгийн төсөвт өртөг бүхий 3050 метр шугамыг ашиглахгүйгээр цэргийн ангийг төвлөрсөн дулаанд холбосон нь улсын хөрөнгийг үр ашиггүй зардалд гаргасан хэмээн үзсэн аж.

Тэгвэл баттай эх сурвалжийн өгүүлснээр түүнийг яллагдагчаар татсан нь үнэн гэлээ.

Харин энэ талаар Д.Оюунхорол гишүүн “Ахуйн газтай холбоотой асуудлаар АТГ хянаж үзсэн. Үүн дээр намайг яллагдагчаар татаагүй. Улс төрд яваа хүний талаар иймэрхүү мэдээлэл цацагдаж л байдаг. "Гранд повер" компани надад ямар ч хамааралгүй. Тухайн үедээ салбартаа тэргүүлэгч компани байсан. Шийдвэр нь Засгийн газраас гарсан" гэж хэвлэлд мэдэгдээд байсан юм.

Г.Нацаг